Yeni Avropa-Asiya marşrutu sınaqdan keçiriləcək
Varşava, 27 iyun, AZƏRTAC
“Polşa Dövlət Dəmir Yolları” Səhmdar Cəmiyyətinin (PKP) “Linia Hutnicza Szerokotorowa” dəmir yolu xətti “Far East Land Bridge” firması ilə birlikdə Transxəsər marşrutu ilə Slavkuvdan (Sileziya voyevodalığı) Urumçi (Çin) şəhərinə ilk konteyneri yola salmağa hazırlaşır.
AZƏRTAC xəbər verir ki, layihənin məqsədi Avropa ilə Asiyanı birləşdirən yeni dəmir yolu marşrutunu sınaqdan keçirməkdir.
PKP-nin idarə heyətinin başçısı Zbiqnev Tratsixleb deyib: “İşə saldığımız marşrut dəniz yolundan qısa, hava yolundan xeyli ucuzdur. Bu, uzaq dəniz səfərindən yaxa qurtarmağa, Avropa İttifaqı ilə sərhədi rahat keçməyə, yüklərin düz vaxtında çatdırılmasını təmin etməyə çalışan ekspeditorların və yükdaşıyanların istəyinə uyğun gəlir”.
Beynəlxalq Transxəzər Nəqliyyat Marşrutu Azərbaycan, Qazaxıstan, Xəzər dənizi, Gürcüstan, Qara dəniz və Ukraynadan keçərək Polşanın Slavkuv şəhərinə gedir. PKP-nin ən qərb yükboşaltma terminalı burada yerləşir.
Ehtimala görə, “Qazaxıstan Dəmir Yolları” 2020-ci ildən etibarən hər il Transxəzər marşrutu ilə Çindən Avropaya təqribən 800 min konteyner daşıyacaq.
Nigar Cəfərli
AZƏRTAC-ın xüsusi müxbiri
Varşava
Bölmənin digər xəbərləri
