"Alfa Sığorta"nın üçüncü növbə tələbləri üzrə ödənişlər həyata keçirilir
Bakı, 21 iyun, AZƏRTAC
Maliyyə Bazarlarına Nəzarət Palatasının Direktorlar Şurasının 2016-cı il 26 avqust tarixli qərarı ilə lisenziyası ləğv edilmiş "Alfa Sığorta" ASC tərəfindən hazırda üçüncü növbə kreditor tələbləri üzrə ödənişlər həyata keçirilir.
Palatanın mətbuat xidmətindən AZƏRTAC-a bildiriblər ki, aktivlərin məhdud olması səbəbindən ləğvetmə komissiyası tərəfindən "Sığorta fəaliyyəti haqqında" Qanunun tələblərinə uyğun olaraq ödənişlərin kreditor tələblərinin mütənasib olaraq 23 faizi həcmində ödənilməsi qərara alınıb.
Qeyd edək ki, 1 saylı Bakı İnzibati-İqtisadi Məhkəməsinin 2016-cı il 29 avqust tarixli qərarı ilə "Alfa Sığorta" ASC müflis elan edilib və onun iflası proseduruna başlanılıb. Bu müddət ərzində ləğv prosesində olan "Alfa Sığorta" ASC-nin kreditorlarının tələblərinin reyestri tərtib edilib və məhkəmə tərəfindən təsdiqlənib. Məsələyə yekun olaraq Azərbaycan Respublikasının Ali Məhkəməsində baxılıb. Hazırda sığorta şirkətinin ləğvetmə prosesi davam edir.
Bölmənin digər xəbərləri
