"Sabah" basketbol klubunun baş məşqçisi: Fasilədə verdiyimiz qərarlar özünü doğrultdu
Bakı, 4 oktyabr, AZƏRTAC
Oyunçularımı təbrik edirəm. Onlar xüsusilə də fasilədən sonra oyundan qopmadılar və ilk hissədəki səhvləri təkrarlamadılar. Fasilədə verdiyimiz qərarlar özünü doğrultdu. Oyunun gedişatını dəyişməyi bacardıq.
AZƏRTAC xəbər verir ki, bu sözləri "Sabah" basketbol komandasının baş məşqçisi Boban Mitev FIBA Avropa Kubokunda Şimali Makedoniya təmsilçisi "Rabotniçki"yə 83:81 hesabı ilə qalib gəldikləri oyundan sonra klubun mətbuat xidmətinə açıqlamasında deyib.
51 yaşlı mütəxəssis Niderland “Donar”ını məğlub etdikləri ilk matçda olduğu kimi bu dəfə də son dəqiqələrdə yaxşı oynamadıqlarını bildirib: “Bu da komandanın avrokubok təcrübəsinin az olmasından irəli gəlir. Lakin daha yaxşı oyun sərgiləyəcəyimizə inanıram. "Rabotniçki" klubuna cari mövsümdə uğurlar arzulayıram".
Qeyd edək ki, Azərbaycan təmsilçisi qrupdakı son matçında Rumıniyanın "Rapid" kollektivi ilə üz-üzə gələcək. Qarşılaşma oktyabrın 5-də baş tutacaq.
Bölmənin digər xəbərləri
