ABŞ-ın Nevada ştatında mayın 28-i “Azərbaycan Milli Günü” elan edilib
Vaşinqton, 21 may, AZƏRTAC
ABŞ-ın Nevada ştatında 28 may tarixi “Azərbaycan Milli Günü” elan edilib. Ştatın qubernatoru Brayan Sandoval və dövlət katibi Barbara Çegavski bununla bağlı müvafiq bəyannamə imzalayıblar.
Azərbaycanın Los-Ancelesdəki baş konsulluğuna göndərilmiş bəyannamədə bildirilir ki, Azərbaycan 1918-ci ilin 28 may tarixində öz müstəqilliyini elan edərək demokratik respublika təsis edib və İslam dünyasında ilk dünyəvi parlamentar dövlət qurub.
Qeyd olunur ki, müstəqilliyini elan etdikdən sonra Azərbaycan qısa müddət ərzində dini etiqadından, cinsindən, irqindən və etnik kimliyindən asılı olmayaraq bütün vətəndaşlarına seçki hüququ verib, hətta qadınlara seçki hüququnun verilməsi məsələsində ABŞ-ı bir il qabaqlayıb.
Həmçinin 1991-ci ildə Sovet İttifaqının süqutundan sonra Azərbaycanın öz müstəqilliyini bərpa etdiyi və möhkəmləndirdiyi vurğulanaraq hər il ABŞ da daxil olmaqla, dünyanın müxtəlif ölkələrində yaşayan milyonlarla azərbaycanlının 28 may tarixini Milli Gün kimi qeyd etdiyi bildirilir.
Yusif Babanlı
AZƏRTAC-ın xüsusi müxbiri
Vaşinqton
Bölmənin digər xəbərləri
