ABŞ-ın “Pfizer” şirkəti ona məxsus peyvəndin Yaponiyada tətbiqi üçün müraciət edib
Tokio, 18 dekabr, AZƏRTAC
ABŞ-ın tanınmış “Pfizer” farmasevtik şirkəti ona məxsus peyvəndin Yaponiyada COVID-19 pandemiyasına qarşı ilkin olaraq tətbiqi barədə müraciət edib.
AZƏRTAC Yaponiya KİV-lərinə istinadla xəbər verir ki, şirkət Yaponiya Səhiyyə Nazirliyinə bu barədə müraciəti dekabrın 18-də göndərib. “Pfizer” şirkətinin Almaniyanın “BioNTech” şirkəti ilə birlikdə hazırladığı peyvəndin artıq ABŞ və Böyük Britaniyada tətbiq olunduğu bildirilir.
Qeyd edilir ki, Yaponiya hökuməti ilə “Pfizer” arasında gələn il iyunun sonlarınadək 60 milyon insan üçün peyvənd dozasının təminatı barədə prinsipial razılaşma əldə edilib. Yaponiyada həmin preparatın sınaqlarına oktyabr ayından başlanılıb.
Şirkətin yaydığı məlumata görə, bütün dünyada aparılmış kliniki sınaqların təhlilinə əsasən onun istehsal etdiyi peyvənd 95 faiz səmərəlidir.
Bununla yanaşı, Yaponiya Səhiyyə Nazirliyinin həmin peyvəndin səmərəliliyi və təhlükəsizliyi barədə öz rəyini bildirəcəyi də qeyd edilir.
Vüqar Ağayev
AZƏRTAC-ın xüsusi müxbiri
Tokio
Bölmənin digər xəbərləri
