ABŞ Konqresində Xocalı faciəsi ilə bağlı daha bir bəyanat səslənmişdir
Vaşinqton, 20 fevral (AZƏRTAC). Təəssüf ki, bu gün Azərbaycandan xaricdə Xocalının taleyinə kifayət qədər diqqət yetirən yoxdur.
Bunu ABŞ Konqresinin Nümayəndələr Palatasında Azərbaycan üzrə işçi qrupunun həmsədri Dən Boren bildirmişdir. Xocalı faciəsinin 20 illiyi ilə bağlı verdiyi bəyanatda oklahomalı konqresmen diqqətə çatdırmışdır ki, yüksək səviyyəli rəsmi şəxslərin səlahiyyətlərindən biri də tanınması zəruri olan həqiqətləri üzə çıxarmaqdır. 1992-ci ilin fevralın 25-dən 26-na keçən gecə Azərbaycanın Dağlıq Qarabağ bölgəsindəki Xocalı şəhərinə erməni silahlı qüvvələrinin hücumu nəticəsində şəhər və onun sakinləri tamamilə məhv edilmişdir. Amerika qanunvericisi xatırlatmışdır ki, vaxtında Xocalı faciəsi beynəlxalq media tərəfindən, o cümlədən “Boston Globe”, “Vaşinqton Post”, “New-York Times”, “Finacial Times” qəzetləri və bir çox Avropa və Rusiya xəbər agentlikləri tərəfindən geniş işıqlandırılmışdı. Qeyd edilmişdir ki, Xocalı şəhəri Ermənistan-Azərbaycan, Dağlıq Qarabağ münaqişəsi ərzində Azərbaycan mənşəli əhalinin ən böyük qırğına məruz qaldığı məkandır. Yeddi min əhalisi olan Xocalı hücumdan sonra tamamilə yerlə-yeksan edilmiş, yüzlərlə insan vəhşicəsinə qətlə yetirilmiş və yaralanmışdır.
Dən Borenin sözlərinə görə, 20 il üstündən keçsə belə, münaqişə həll edilməmiş qalır. ATƏT-in Minsk qrupunun həmsədr ölkələri prezidentlərinin son bəyanatına istinad edən konqresmen “status kvo”nu qəbuledilməz adlandırmışdır. O demişdir: “Azərbaycan ABŞ-ın güclü strateji tərəfdaşı və dostudur. Xocalı faciəsi bəşəriyyətə qarşı cinayət idi. Mən, həmkarlarımı azərbaycanlılarla birgə bu faciəni anmağa çağırıram”.
Şəfəq Akifqızı
AZƏRTAC-ın xüsusi müxbiri
Vaşinqton
Bölmənin digər xəbərləri
