ABŞ Prezidenti: Venesuela əməliyyatının xərclərini neft gəlirləri ilə dəfələrlə geri qaytarmışıq
Bakı, 24 iyun, AZƏRTAC
ABŞ Venesueladakı hərbi əməliyyatlara çəkilən xərcləri ölkənin neft ehtiyatlarına çıxış hesabına dəfələrlə kompensasiya edib.
AZƏRTAC xəbər verir ki, bu barədə ABŞ Prezidenti Donald Tramp Pensilvaniya ştatında çıxışı zamanı deyib.
“Venesuela. Birgünlük əməliyyat. İndi Venesuela ilə yaxşı pul qazanırıq. Venesuela da yaxşı vəziyyətdədir. Bu müharibəni qazanmaq üçün bizə cəmi 48 dəqiqə lazım oldu. İnanın ya da inanmayın, bu müharibənin xərclərini 28 dəfə, hətta daha çox geri qaytardıq. Çünki milyonlarla barel neft çıxardıq”, – deyə Tramp vurğulayıb.
ABŞ lideri, həmçinin Vaşinqtonla Karakas arasında münasibətlərin hazırda müsbət məcrada inkişaf etdiyini qeyd edib.
“Biz çox yaxşı yola gedirik. Onu idarə edən əla insanlardır”, – deyə Ağ Ev rəhbəri əlavə edib.
Tramp çıxışında Venesuela ilə əməkdaşlığın iqtisadi nəticələrini önə çəkərək, ölkənin enerji resurslarının ABŞ üçün mühüm əhəmiyyət daşıdığını bildirib.
Bölmənin digər xəbərləri
