ABŞ Sakit okeanda narkotik ticarəti ilə əlaqəli gəmiyə zərbə endirib
Bakı, 30 dekabr, AZƏRTAC
ABŞ hərbçiləri Sakit okeanın şərq hissəsində, beynəlxalq sularda narkotik kartelləri tərəfindən istifadə edildiyi iddia edilən bir gəmiyə zərbə endiriblər. Hücum nəticəsində iki nəfərin öldüyü bildirilir.
AZƏRTAC xəbər verir ki, bu barədə ABŞ-ın Cənub Komandanlığının X sosial şəbəkəsində yayımladığı açıqlamada qeyd olunub.
Açıqlamada bildirilib ki, kəşfiyyat məlumatları gəminin Şərqi Sakit okeanda məlum narkotik qaçaqmalçılığı marşrutu ilə hərəkət etdiyini və narkotik ticarəti məqsədilə istifadə olunduğunu təsdiqləyib. Komandanlıq zərbə nəticəsində iki nəfərin həlak olduğunu təsdiqlədiyini bildirib.
Qeyd olunub ki, “Cənub Nizə” əməliyyatı çərçivəsində fəaliyyət göstərən Birgə Operativ Qrup hücuma dekabrın 29-da ABŞ-ın müdafiə naziri Piet Heqsetin göstərişi ilə başlayıb.
Bölmənin digər xəbərləri
