Adil Mahmudov: Azərbaycanda elektron idman növlərinin inkişafı üçün hər cür şərait var
Bakı, 17 may, AZƏRTAC
Ölkəmizdə digər sahələrdə olduğu kimi, idmanda da inkişaf gözqabağındadır. İdmana dövlət tərəfindən göstərilən diqqət və qayğının nəticəsidir ki, atletlərimiz beynəlxalq arenada ölkəmizi layiqincə təmsil edir, üçrəngli bayrağımızı dalğalandırırlar. Azərbaycanda elektron idman növlərində də əldə olunan nailiyyətlər sevinc doğurur. Azərbaycan Elektron İdman Növləri Federasiyasının prezidenti Adil Mahmudov idmanın bu növünün ölkəmizdə inkişaf perspektivləri və nəzərdə tutulan planlar barədə AZƏRTAC-a müsahibə verib.
Həmin müsahibəni təqdim edirik:
-Azərbaycan Elektron İdman Növləri Federasiyasının əsas hədəfləri nədən ibarətdir?
-Elektron idman növləri bütün dünyada böyük populyarlıq qazanıb. Son illər elektron idman yarışlarında böyük mükafat fondları olur. Azərbaycanda elektron idman növlərinin inkişafı üçün hər cür şərait var. Gənclər və İdman Nazirliyi həmişə bizə dəstək olur. Suala gəlincə əsas hədəf əhatəmizi artırmaqdır. Gənclərin elektron idman növləri ilə peşəkar səviyyədə məşğul olmasına şərait yaratmaqdı. Biz istəyirik ki, dünya və Avropa çempionatlarında layiqli təmsilçilərimiz olsun. Növbəti illərdə oyunçularımız medallar uğrunda yarışsınlar.
Elektron idman növlərinin gələcəyi daha böyük rəqabətli olacaq. Ona görə biz rəqabətə hazır olmalıyıq. Elektron idman növləri Avropa Oyunlarında və ya başqa mötəbər multi idman tədbirində proqrama daxil edilə bilər.
-Bir müddət əvvəl Azərbaycan çempionatının qalibləri mükafatlandırıldı. Solo növdə qaliblər Polşada keçiriləcək Avropa çempionatına vəsiqə qazanıb. İdmançılarımızın çempionata hazırlığı necə gedir?
-Azərbaycan çempionatının mükafatlandırma mərasimi ilk dəfə olaraq daha təntənəli keçirildi. Məqsəd iştirakçılara növbəti yarış üçün böyük motivasiya vermək idi. Qaliblərin artıq beynəlxalq yarışlara hazırlığı başlayıb. Elektron idman növlərində hazırlıq adi idmandan fərqlənir. Onlar yerli və xarici oyunçularla oyunlarda iştirak edirlər. Daha sürətli olmağa çalışırlar. Federasiya olaraq təmsilçilərimizlə həmişə əlaqədəyik. İstənilən köməkliyi etməyə hazır olduğumuzu bildirmişik. Fikrimcə bu il beynəlxalq yarışlarda təmsilçilərimiz layiqli çıxış edəcəklər.
-Ölkəmizdə hər hansı irimiqyaslı turnirin təşkili nəzərdə tutulubmu?
-Elektron idman növlərində yarışlar həm əyani, həm də onlayn formatda keçirilir. Bu tipli yarışlarda kütləvi turnirlərin təqvimləri illər əvvəl müəyyənləşir. Amma biz yaxın aylarda beynəlxalq turnirlərin keçirilməsi barədə müzakirələr aparırıq.
-İdmanın bu növünün ölkədə populyarlaşdırılması və kütləviləşməsi istiqamətində federasiya tərəfindən hansı işlər görülür?
-Elektron idman növlərinin populyarlığı son illər çox artıb. Amma biz daha böyük əhatəmizin olmasını istəyirik. Bu gün Qafqazın ən böyük elektron arenası Bakıda yerləşir. Orada mütəmadi olaraq yüzlərlə oyunçu yarışda iştirak edir. Əsas planlarımız sırasında bölgələrdə yeni mərkəzlərin açılmasıdır. Hazırda Bakı kəndlərində bu istiqamətdə işimiz uğurlar davam edir. Gələcəkdə regionlarda da yeni məkanlara ehtiyac olacağını düşünürük.
-Məşhur geymerlərin ölkəmizə dəvəti və ustad dərslərinin təşkili nəzərdə tutulubmu?
-Ustad dərsləri barədə danışıqlar olub. Hazırda biz milli komanda üzvlərinin yeniyetmələrlə görüşlərinin təşkilini reallaşdırmaq istəyirik. Məşhur geymerlərin ölkəmizə dəvəti növbəti illərdə mümkün olacaq. 2023-cü ildə əsas diqqətimizi Bakı və regionlarda elektron idman növlərinin daha da populyarlaşmasına yönəltmişik.
Bölmənin digər xəbərləri
