Ağcabədidə 20 Yanvar faciəsi qurbanlarının xatirəsi yad edilmişdir
Ağcabədi, 20 yanvar (AZƏRTAC). 20 Yanvar faciəsinin 22-ci ildönümü münasibətilə Ağcabədidə ümumrayon tədbiri keçirilmişdir.
AZƏRTAC xəbər verir ki, rayon rəhbərliyi, ağsaqqallar, gənclər, ziyalılar, əmək kollektivlərinin nümayəndələri əvvəlcə şəhidlər xiyabanına gələrək Vətənimizin müstəqilliyi və ərazi bütövlüyü uğrunda həlak olanların məzarları üstünə və 20 Yanvar qurbanlarının xatirəsinə ucaldılmış abidə kompleksi önünə çiçək dəstələri düzmüşlər. Şəhidlərin ruhuna dualar oxunmuşdur.
Tədbir Qarabağ Muğam Mərkəzində davam etdirilmişdir. Rayon icra hakimiyyətinin başçısı Şahin Məmmədov Azərbaycan tarixinin azadlıq mübarizəsinin və qəhrəmanlıq salnaməsinin parlaq səhifələrindən olan 20 Yanvar faciəsindən danışmışdır. Bildirmişdir ki, bu terror aksiyasına ilk olaraq etirazını bildirən ulu öndər Heydər Əliyev olmuşdur. Ulu Öndər Heydər Əliyev 20 Yanvar faciəsinin ertəsi günü həyatı üçün yarana biləcək təhlükədən çəkinməyərək Moskvadakı Azərbaycan nümayəndəliyinə gedərək orada mətbuat konfransı keçirmişdir.
Tədbirdə Moskvadakı Azərbaycan nümayəndəliyində ümummilli lider Heydər Əliyevin keçirdiyi mətbuat konfransına aid sənədli film göstərilmişdir.
Tədbirin sonunda rayon mədəniyyət və turizm şöbəsinin hazırladığı ədəbi-bədi kompozisiya nümayiş etdirilmişdir.
Bölmənin digər xəbərləri
