Ağdamın Xıdırlı və Kəngərli kəndlərinin sakinlərinə səyyar tibbi xidmət göstərilib
Bakı, 26 avqust, AZƏRTAC
İşğaldan azad olunmuş ərazilərdə yaşayan sakinlərin tibbi xidmətlərə çıxışının yaxşılaşdırılması və zəruri xidmətlərin onların yaşayış yerində göstərilməsi Tibbi Ərazi Bölmələrini İdarəetmə Birliyinin (TƏBİB) əsas fəaliyyət istiqamətlərindəndir.
TƏBİB-dən AZƏRTAC-a bildirilib ki, tibb məntəqələrinin fəaliyyət göstərmədiyi yaşayış məntəqələrində tibbi xidmətlərin əlçatanlığını təmin etmək məqsədilə Ağdam Rayon Mərkəzi Xəstəxanasının həkim heyəti Xıdırlı və Kəngərli kəndlərinə səfər edib.
Səyyar xidmət zamanı sakinlərin ümumi sağlamlıq vəziyyəti qiymətləndirilib, terapevt, pediatr, ginekoloq və otorinolarinqoloq tərəfindən müayinələr aparılıb, müvafiq tövsiyələr verilib.
İki kənd üzrə 18-i uşaq olmaqla, ümumilikdə 30-dan çox sakin tibbi xidmətdən yararlanıb. Əlavə müayinə və ixtisaslaşmış tibbi xidmətə ehtiyacı müəyyən edilən sakinlərin aidiyyəti tibb müəssisələrinə yönləndirilməsi təmin olunub.
İşğaldan azad olunmuş ərazilərdə yaşayan əhalinin tibbi xidmətlərə əlçatanlığının artırılması məqsədilə səyyar tibbi xidmətlərin davam etdirilməsi nəzərdə tutulur.
Bölmənin digər xəbərləri
