Ağstafada aqrar sektorda davamlı inkişaf əldə olunub
Ağstafa, 22 oktyabr, AZƏRTAC
Məlum olduğu kimi, bu il respublikamızda “Kənd təsərrüfatı ili” elan edilib. Ölkəmizdə qeyri-neft sektorunun, о cümlədən kənd təsərrüfatının inkişafı dövlət tərəfindən iqtisadi siyasətin prioritet istiqamətlərindən biri kimi müəyyənləşdirilib və bununla əlaqədar respublikada, eləcə də Ağstafada əsaslı tədbirlər görülür. Artıq “Kənd təsərrüfatı ili”nin yarıdan çoxu arxadan qalıb.
Ağstafa Rayon İcra Hakimiyyətinin sosial iqtisadi inkişafın təhlili və proqnozlaşdırılması şöbəsinin müdir müavini Ramiz İmanov AZƏRTAC-ın müxbiri ilə söhbətində rayonda kənd təsərrüfatı sahəsində görülmüş işlərdən, əldə olunmuş nailiyyətlərdən, qarşıda duran vəzifələrdən danışıb.
Ağstafada aqrar sektorda davamlı inkişafın əldə olunduğunu deyən R.İmanov bildirib ki, rayonda 21501 hektar əkin sahəsi mövcuddur. 2015-ci ilin məhsulu üçün bu il 7714 hektar taxıl səpilib və bunun 5624 hektarı buğda, 2090 hektarı arpa sahəsi olub. Mövcud taxıl sahələrinin optimal müddətdə biçilməsini təmin etmək üçün rayona müasir tələblərə cavab verən texnikalar gətirilib və həmin texnikaların qorunub saxlanması üçün xüsusi sahələr ayrılıb. Bu işdə Ağstafa “Aqroservis” MMC-nin fəaliyyəti qərb regionunda kənd təsərrüfatının inkişafı sahəsində daha böyük uğur əldə etməyə imkan verir.
Ümumiyyətlə müasir texnikaların rayona gətirilməsi əkinçilik mədəniyyətinin yüksəlməsinə daha böyük şərait yaradıb. Təkcə onu qeyd etmək olar ki, kartof bitkisinin səpinindən tutmuş, məhsul yığımına kimi bütün aqrotexniki tədbirlər mexanikləşdirilib. Həmsöhbətim qeyd edir ki, müasir texnikalarla sahələrin şumlanmasını, malalanmasını və toxumun səpilməsini bir dəfədə yerinə yetirmək mümkündür. Bütün bunların nəticəsidir ki, cari mövsümdə rayonda taxıl biçini kampaniyası uğurla başa çatıb. Taxıl sahələrindən 22440,9 ton məhsul yığılıb. Bu da əvvəlki illərdən xeyli çoxdur. Hər hektardan götürülən məhsul əvvəlki ildəkindən 1,1 sentner çox olmaqla, 29,1 sentner təşkil edib. Buğda sahələrindən 17153,3 ton, arpa sahələrindən 5287,7 ton məhsul əldə olunub.
R.İmanov deyir ki, rayonda üzümçülüyün inkişaf etdirilməsinə də xüsusi qayğı göstərilir, yeni növ süfrə sortları əkilir: “Dünyanın bir çox ölkələrindən, eləcə də Fransadan gətirilən süfrə növü olan üzüm tingləri fermerlərə verilib və həmin tinglərin əkilib-becərilməsinə xüsusi qayğı göstərilib. Təkcə Kolxəlfəli kəndində pay torpaq sahələrində 67 hektar üzüm bağı salınıb”.
Məlum olduğu kimi, rayonun ərazisindən Kür və Ağstafa çayları keçir. Yay mövsümü dövründə əkin sahələrinin suvarılmasında bir sıra problemlər yaranır. Bu problemlərin aradan qaldırılması üçün həmin çayların sularından istifadə edilməsi məqsədilə tədbirlər planı hazırlanıb və onun həyata keçirilməsinə başlanılıb. Düz Qışlaq, Qarahəsənli, Xılxına, Pirli kəndlərinin 3310 hektar əkin sahələrini suvaran 41,49 kilometr daxili suvarma arxları yenidən qurularaq beton üzlük qoyulub, 581 hidrotexniki qurğu quraşdırılıb. Dağkəsəmən kənd sakinlərinin narahatlığına səbəb olan “Acıdərə”dən gələn sel sularının qarşısını almaq üçün su bəndinin tikintisinə başlanılıb və bu iş artıq başa çatmaq üzrədir. Həmin bənddə yığılan su ilə Dağkəsəmən və qonşu kəndlərin əkin sahələrini suvarmaq mümkün olacaq. Eləcə də Ağgöl, Böyük-Kəsik, Sadıxlı, Muğanlı kəndlərindəki torpaq sahələrini suvarmaq üçün mövcud olan kanal təmir edilib, 46,85 kilometr daxili suvarma arxlarına beton üzlük qoyulub, 482 hidrotexniki qurğu quraşdırılıb.
Rayonda heyvandarlığın inkişafı da daim diqqət mərkəzində saxlanılır. Ümumilikdə götürəndə 2015-ci ildə rayonda iribuynuzlu və xırdabuynuzlu heyvanların baş sayı da xeyli artıb.
Ağstafada arıçılığın inkişaf etdirilməsinə də xüsusi qayğı göstərildiyini bildirən R.İmanov qeyd edib ki, bu gün rayonda mövcud olan 2010 ədəd arı ailəsindən əvvəlki illərdəkindən çox məhsul istehsal olunub.
“Kənd təsərrüfatı ili”nin başa çatmasına xeyli az vaxt qalıb. Ağstafada bu sahədə həyata keçirilən tədbirlər əminliklə deməyə əsas verir ki, rayonda aqrar sektorda əldə olunan inkişaf bundan sonra da davam etdiriləcək və yeni-yeni nailiyyətlər qazanılacaq.
Bölmənin digər xəbərləri
