Akaba körfəzində nadir dəniz canlısı müşahidə edilib
Bakı, 8 iyul, AZƏRTAC
Akaba körfəzində nadir rast gəlinən qutu meduzası növü aşkar edilib.
AZƏRTAC İsrailin TPS-IL agentliyinə istinadla xəbər verir ki, mütəxəssislər Alatina grandis adlı bu meduzadan yalnız bir neçə nümunənin müşahidə edildiyini və bunun kütləvi meduza yayılması olmadığını bildiriblər.
İsrailin Təbiət və Parklar İdarəsi dənizə girən şəxsləri diqqətli olmağa çağırsa da, bu hadisənin üzgüçülər üçün ciddi təhlükə yaratmadığını qeyd edib.
Alimlərin məlumatına görə, bu meduza növünə Qırmızı dənizin şimal hissəsində çox nadir hallarda rast gəlinir. Onların Akaba körfəzinə qeyri-adi dəniz axınları və küləklər səbəbindən gəldiyi ehtimal olunur.
Mütəxəssislər bildirirlər ki, Alatina grandis meduzasının sancması ağrılı ola və bəzi hallarda tibbi yardım tələb edə bilər. Lakin bu növ dünyanın ən təhlükəli meduzalarından olan Avstraliyanın "dəniz arısı" kimi tanınan qutu meduzası qədər zəhərli deyil.
İsrailin Təbiət və Parklar İdarəsi vətəndaşlara dənizdə belə canlılarla qarşılaşdıqda onlara toxunmamağı, təhlükəsiz məsafə saxlamağı və aidiyyəti qurumlara məlumat verməyi tövsiyə edib.
Bölmənin digər xəbərləri
