Aktau yaxınlığında baş vermiş təyyarə qəzasının səbəbləri yaxın günlərdə açıqlanacaq
Astana, 4 fevral, AZƏRTAC
Azərbaycan, Rusiya, Braziliya və ICAO-dan beynəlxalq mütəxəssislər cəlb olunub. Yaxın günlərdə ilkin hesabatın rəsmi olaraq saytımızda dərc ediləcəyini gözləyirik.
AZƏRTAC Qazaxıstan mediasına istinadən xəbər verir ki, bunu Qazaxıstanın nəqliyyat naziri Marat Karabayev Azərbaycan Hava Yollarına (AZAL) məxsus təyyarənin qəzaya uğraması ilə bağlı aparılan araşdırma barədə açıqlamasında bildirib.
Mütəxəssislərin işlərini davam etdirdiklərini deyən nazir əlavə edib: “Onlara işlərini başa çatdırmaq üçün vaxt lazımdır. Bu, çox incə və zəhmət tələb edən işdir”.
Xatırladaq ki, AZAL-a məxsus və Bakı-Qroznı reysi ilə uçan sərnişin təyyarəsi dekabrın 25-də Qazaxıstanın Aktau şəhəri yaxınlığında qəzaya uğrayıb. Təyyarədəki 67 nəfərdən 38-i həlak olub, 29 nəfər sağ qalıb.
Elşən Rüstəmov
AZƏRTAC-ın xüsusi müxbiri
Astana
Bölmənin digər xəbərləri
