Aktauda 20 Yanvar faciəsi qurbanlarının xatirəsi anılmışdır
Aktau, 20 yanvar (AZƏRTAC). Azərbaycanın Aktaudakı baş konsulluğu Xaricdə Təhsil Alan və Məzun Olmuş Azərbaycanlı Gənclərin Beynəlxalq Forumu - ASAİF-in Qazaxıstan üzrə nümayəndəliyi ilə birgə Məngistay vilayətindəki ali məktəblərdə oxuyan azərbaycanlı gənclərin iştirakı ilə 20 Yanvar faciəsinin 22-ci ildönümünə həsr olunmuş anma mərasimi keçirmişlər.
Mərasim iştirakçıları əvvəlcə salonda faciə ilə əlaqədar yaradılmış fotostend və kitablardan ibarət sərgi ilə tanış olmuş, şəhidlərinin xatirəsi bir dəqiqəlik sükutla yad edilmişdir.
Azərbaycanın Aktaudakı baş konsulu Rəşad Məmmədov 20 Yanvar faciəsi haqqında ətraflı məlumat vermiş, ölkəmizin müstəqilliyi və ərazi bütövlüyü uğrunda həlak olmuş şəhidlərin əziz xatirəsinin qəlblərimizdə əbədi yaşayacağını bildirmişdir.
Sonra ASAİF-in Qazaxıstan üzrə nümayəndəsi Əli Əliabbasov, Ş.Yesenov adına Kaspi Dövlət Texnologiya və Mühəndislik Universitetinin tələbələri Firuzə Nəsibova və İlkin Orucov çıxış edərək 20 Yanvar faciəsinin Azərbaycan xalqının müstəqillik uğrunda apardığı mübarizənin şərəfli səhifələrindən biri olduğunu bildirmişlər.
Tədbirdə tələbələrin 20 Yanvar faciəsi ilə bağlı hazırladıqları videoçarxlar, həmçinin 20 Yanvar faciəsindən bəhs edən film nümayiş olunmuşdur.
Qulu Kəngərli
AZƏRTAC-ın xüsusi müxbiri
Aktau
Bölmənin digər xəbərləri
