ALEKSANDR LUKAŞENKO: AZƏRBAYCANIN ÇOX BÖYÜK PERSPEKTİVLƏRİ VAR
Aleksandr Lukaşenko demişdir: “Bizim Azərbaycanla çoxdan normal qarşılıqlı münasibətlərimiz var. Bakıda və Minskdə səfirliklərimizin açılması əməkdaşlığımızın daha da genişlənməsinə təkan verəcəkdir. Biz yaxın vaxtlarda ölkələrimiz arasında əmtəə dövriyyəsinin həcmini xeyli artıra bilərik”.
Prezidentin sözlərinə görə, Belarus Azərbaycanı regionun ən varlı ölkələrindən biri sayır. O demişdir: “Biz Azərbaycanın çox böyük perspektivləri olduğunu görürük. Bizim bu ölkəyə müəyyən marağımız var. Eləcə də Azərbaycan tərəfi Belarus iqtisadiyyatına maraq göstərir. Biz bu istiqamətdə əməkdaşlığa hazırıq”.
Aleksandr Lukaşenko səfirdən onun xoş arzularını Azərbaycan dövlətinin başçısı İlham Əliyevə çatdırmağı xahiş etmiş və bildirmişdir ki, Minskdə Azərbaycan Prezidentinin yolunu gözləyirlər. O, Azərbaycan Prezidentinin Belarusa səfərinin elə bu il baş tuta biləcəyini və səfər zamanı uzunmüddətli iqtisadi əməkdaşlıq haqqında sənəd imzalanacağını istisna etmədiyini bildirmişdir.
Səfir Əli Nağıyev Azərbaycan Prezidentinin səmimi salamını və arzularını Aleksandr Lukaşenkoya yetirmişdir. Diplomat əmin etmişdir ki, Belarusun və ölkə iqtisadiyyatının hərtərəfli inkişafını Azərbaycanda yüksək qiymətləndirirlər. O demişdir: “Azərbaycanda Belarusla ikitərəfli münasibətlərdə çox maraqlıdırlar. Sevindirici haldır ki, son illər Belarus-Azərbaycan iqtisadi əməkdaşlığında artım meyli müşahidə edilir”.
Bölmənin digər xəbərləri
