Aleksandr Sırski: Rusiyanın genişmiqyaslı hücumu uğursuzluqla nəticələnib
Kiyev, 10 iyul, AZƏRTAC
2026-cı ildə Rusiya ordusu Ukrayna cəbhəsində daha bir genişmiqyaslı hücuma cəhd edib. Lakin düşmən heç bir məqsədinə nail ola bilməyib.
AZƏRTAC xəbər verir ki, bu barədə Ukrayna Silahlı Qüvvələrinin (USQ) Baş komandanı Aleksandr Sırski “Telegram” kanalında bildirib.
Baş komandan Rusiyaya qarşı müharibədə 2026-cı ilin birinci yarısına olan nəticələri ümumiləşdirib.
“Düşmən genişmiqyaslı hücuma keçməyə cəhd edib, lakin şəxsi heyət və texnika baxımından təxminən ikiqat üstünlüyə malik olmasına baxmayaraq, heç bir məqsədinə nail ola bilməyib. Əvvəllər Rusiya ordusu 13 əməliyyat istiqamətində fəal hücum əməliyyatları aparırdısa, indi maksimum altı və ya yeddi belə istiqamət qalıb, -deyə Sırski vurğulayıb.
Onun sözlərinə görə, Ukrayna əsgərləri təkcə müdafiə əməliyyatını davam etdirmir, həm də fəal əks əməliyyatlar aparır və cəbhədə təşəbbüsü əldə saxlayırlar.
Baş komandan vurğulayıb ki, Ukrayna Silahlı Qüvvələrinin hücum əməliyyatlarının Rusiya ordusunun əməliyyatlarına nisbəti təxminən 40:60-dır. Bundan əlavə, Rusiya qoşunlarının irəliləmə sürəti yarıdan çox azaldılıb.
Sırski onu da qeyd edib ki, düşmənin orta aylıq itkiləri təxminən 32 min əsgər təşkil edir. Beləliklə, Ukrayna Rusiyaya qarşı hücumları azaltma strategiyasını uğurla həyata keçirir.
“İrəliləmə sürəti baxımından iki tərəf effektiv şəkildə bərabərliyə yaxınlaşıb. Ukrayna Müdafiə Qüvvələri tərəfindən azad edilən torpaqların düşmənin irəliləməyə nail olduğu ərazilərə nisbəti artmaqda davam edir”, -deyə Sırski bildirib.
O, həmçinin əlavə edib ki, Ukraynanın Dərin Hücum Vasitələri Rusiyadakı 697 hədəfə zərbə endirib. Düşmənə dəyən birbaşa və dolayı iqtisadi ziyan 6,1 milyard dollardan çoxdur.
Eyni zamanda, “Orta hücum” kampaniyası da yüksək effektivlik nümayiş etdirib. Altı ay ərzində 7028 düşmən hədəfinə zərbələr endirilib.
Bundan əlavə, artilleriya 456 mindən çox atəş tapşırığı yerinə yetirib. Raket qüvvələri 1140-dan artıq, Hərbi Hava Qüvvələrinin təyyarələri 1100-dən çox, dəstək bölmələri isə təxminən 1400 zərbə endirib.
Bölmənin digər xəbərləri
