Ali təhsil müəssisələrinə qəbul imtahanlarında yüksək nəticə göstərən abituriyentlərlə görüş olub
Bakı, 5 sentyabr, AZƏRTAC
Xəzər rayonunda 2022-2023-cü tədris ilində ali təhsil ocaqlarına qəbul imtahanlarında yüksək nəticə əldə edərək 600-dən yuxarı bal toplayan abituriyentlərlə görüş keçirilib.
Xəzər Rayon İcra Hakimiyyətindən AZƏRTAC-a verilən məlumata görə, əvvəlcə tədbir iştirakçıları Ümummilli Lider Heydər Əliyevin büstü önünə gül dəstələri düzüb, əziz xatirəsini ehtiramla anıblar. Ulu Öndərin və ölkəmizin ərazi bütövlüyü uğrunda canından keçən şəhidlərimizin əziz xatirələri bir dəqiqəlik sükutla yad edilib.
Sonra Ümummilli Lider Heydər Əliyevin 2002-2003-cü tədris ilində ali təhsil ocaqlarına ən yüksək balla qəbul olunmuş tələbələrlə görüşündən hazırlanmış videoçarx nümayiş olunub.
Tədbirdə çıxış edən Xəzər Rayon İcra Hakimiyyətinin başçısı Elşən Salahov Ümummilli Lider Heydər Əliyevin ötən əsrin 70-ci illərində əsasını qoyduğu təhsil strategiyasının ölkəmizdə milli köklərə bağlı, təhsilli gənc kadrların yetişdirilməsinə hesablandığını və təhsilin millətin taleyi üçün misilsiz əhəmiyyət daşıdığını hər zaman vurğulayan Ulu Öndər Heydər Əliyevin bu sahəyə çox böyük diqqət və qayğı göstərdiyini qeyd edib. Bildirib ki, Ümummilli Liderin siyasətini uğurla davam etdirən Prezident İlham Əliyev və birinci xanım Mehriban Əliyeva tərəfindən ölkəmizdə təhsilə olan diqqət və qayğı göz qabağındadır. Son illərdə ölkədə yeni məktəb, bina və komplekslərinin tikintisinin, eyni zamanda, köhnələrin əsaslı təmirinin böyük vüsət aldığını diqqətə çatdıran E.Salahov deyib ki, tədris prosesində gənclərimiz ən qabaqcıl texnologiyalardan, distant təhsil imkanlarından istifadə edirlər. Ölkənin hər guşəsində müasir məktəb binaları, tədris avadanlıqları, sürətli internetə çıxışı olan kompüterlər, elektron lövhələr, zəngin fonda malik kitabxanalar, laboratoriyalar və idman zalları şagirdlərin istifadəsinə verilib. Yaradılan şərait öz bəhrəsini göstərməkdədir. Ümumtəhsil məktəblərini bitirən gənclər ali və orta ixtisas məktəblərinə qəbulda yüksək nəticələr göstərir, ixtisaslı kadr kimi yetişərək ölkəmizin inkişafında, həyata keçirilən quruculuq tədbirlərində yaxından iştirak edirlər.
Daha sonra Milli Məclisin deputatları Rauf Əliyev və Soltan Məmmədov, YAP Xəzər rayon təşkilatının sədri Namiq Əhmədov və təhsil müəssisələrinin nümayəndələri çıxış ediblər. Bildirilib ki, bu gün ölkəmizdə davamlı inkişaf və sabitliklə yanaşı, həm də sağlam mənəvi mühit formalaşır, məktəblilər milli ruhda yetişir və bu nailiyyətlər dövlətin təhsilə olan diqqət və qayğısının bariz nümunəsidir.
Görüşdə, həmçinin qəbul imtahanında 675,8 bal toplayan Buzovna qəsəbəsi 26 nömrəli məktəbin məzunu Rəsul Mustafazadə çıxış edərək, onlara yaradılan şəraitə görə dövlətimizin başçısı İlham Əliyevə, birinci xanım Mehriban Əliyevaya gənclər adından öz təşəkkürünü bildirib.
Tədbirdə 2022-2023-cü tədris ilində ali təhsil ocaqlarına qəbul imtahanlarında yüksək nəticə əldə edərək 600-dən yuxarı bal toplayan tələbələr Xəzər Rayon İcra Hakimiyyəti tərəfindən diplomlarla təltif olunub, qiymətli hədiyyələrlə mükafatlandırılıb.
Sonda xatirə şəkli çəkilib.
Bölmənin digər xəbərləri
