Almaniyada istilik dalğası rekord göstəricilərlə müşayiət olunur
Berlin, 25 iyun, AZƏRTAC
Almaniyada davam edən istilik dalğası ölkənin bir çox bölgəsində rekord göstəricilərlə müşayiət olunur.
AZƏRTAC xəbər verir ki, ötən gecə Reynland-Pfalts əyalətinin Bad Berqzabern şəhərində temperatur 26,2 dərəcə olub. Bu, ölkədə indiyədək qeydə alınmış ən isti gecələrdən biri kimi tarixə düşüb və 2019-cu ildə müəyyən edilmiş rekord göstəricini təkrarlayıb.
Almaniya Meteorologiya Xidməti Şimali Reyn-Festfaliya, Hessen, Saarland və Reynland-Pfalts əyalətlərində ekstremal istilik yükü barədə xəbərdarlıq edib. Həftəsonu isə xüsusilə Berlin və Brandenburq əyalətlərində temperaturun 44 dərəcəyədək yüksələ biləcəyi gözlənilir. Bu, Almaniyada indiyədək qeydə alınmış 41,2 dərəcəlik mütləq temperatur rekordunun yenilənməsi ilə nəticələnə bilər.
Yüksək temperatur gündəlik həyata da təsir göstərir. Berlin Futbol Assosiasiyası bir sıra oyunları təxirə salıb, uşaqlar arasında keçirilən bütün qarşılaşmalar ləğv edilib. Brandenburqda müxtəlif açıq hava tədbirləri də dayandırılıb.
Artan quraqlıq fonunda meşə yanğınları təhlükəsi yüksəlib. Noystrelits yaxınlığında yanğın artıq 82 hektar ərazini əhatə edir. Bavariyada isə həftəsonu meşə yanğınlarının erkən aşkarlanması məqsədilə müşahidə uçuşlarına başlanacağı bildirilib.
Bölmənin digər xəbərləri
