Almaniyada koronavirusdan gündəlik ölüm hallarının sayında rekord qeydə alınıb
Bakı, 16 dekabr, AZƏRTAC
Dekabrın 15-də Almaniyada koronavirus infeksiyası səbəbindən rekord sayda - 805 nəfər həyatını itirib, 21 min 377 yeni yoluxma halı aşkarlanıb.
AZƏRTAC pandemiyanın statistikasını aparan Worldometer saytına istinadla xəbər verir ki, öncəki rekord COVID-19 infeksiyası səbəbindən 622 nəfərin vəfat etdiyi dekabrın 8-də qeydə alınmışdı.
Almaniyada bu gündən başlayaraq pandemiya ilə əlaqədar sərt məhdudiyyət tədbirləri qüvvəyə minib. Ölkədə ərzaq mağazaları, apteklər, yanacaqdoldurma məntəqələri, bank şöbələri və poçtlar istisna olmaqla, bütün pərakəndə satış və xidmət obyektləri bağlanıb, muzeylərin, teatrların və idman zallarının fəaliyyəti dayandırılıb. Restoran və kafelərə isə məhsullarını yalnız evlərə çatdırmağa icazə verilib.
Həmçinin ölkə ərazisində məktəblər fəaliyyət göstərməyəcək, şagirdlər distant təhsilə keçiriləcək. Kilsə ayinləri məhdudiyyətlərlə icra olunacaq, dindardan qoruyucu maska taxılması və aralarında 1,5 metr məsafə saxlanması tələb ediləcək.
Worldometer saytının son məlumatına əsasən, Almaniyada koronavirusa yoluxanların sayı 1 milyon 378 mini ötüb, 23 min 692 nəfər isə infeksiyanın qurbanı olub. Eyni zamanda, 1 milyondan çox insan COVID-19 xəstəliyindən sağalıb, müalicəsi davam edən 351 min 526 xəstədən 4 min 735-nin vəziyyəti ağır qiymətləndirilir.
Xatırladaq ki, mart ayının 11-də Ümumdünya Səhiyyə Təşkilatı yeni koronavirus infeksiyasının yayılmasını pandemiya elan edib.
Bölmənin digər xəbərləri
