Almaniyada seçkilərin qalibi CDU/CSU ittifaqı koalisiya barədə SPD ilə danışıqlara başlayır
Berlin, 28 fevral, AZƏRTAC
Almaniyada fevralın 23-də keçirilmiş federal seçkilərin qalibi Xristian Birlik ittifaqı (CDU/CSU) koalision hökumət qurmaq üçün Sosial Demokrat Partiyası (SPD) ilə danışıqlara başlamağı planlaşdırır.
AZƏRTAC yerli mediaya istinadla xəbər verir ki, tərəflərin hər birindən 9 nəfərin qatılacağı görüşün cümə günü keçirilməsi nəzərdə tutulur. SPD-nin açıqlanan nümayəndə heyətinin tərkibində partiyanın həmsədləri Lars Klinqbayl və Saskia Esken, müdafiə naziri Boris Pistorius və əmək naziri Hubertus Hayl da var. Birliyin nümayəndə heyətinin tərkibi açıqlanmasa da, CDU lideri və ehtimal olunan gələcək Kansler Fridrix Merts, CSU-nun lideri və Bavariya əyalətinin Baş naziri Markus Söder, CDU-nun və CSU-nun baş katiblərinin danışıqlarda iştirak edəcəkləri gözlənilir.
Hər iki partiya seçki kampaniyası dövründə bir-birini sərt şəkildə tənqid etsə də, seçkilərdən sonra koalision hökumətin formalaşdırılması üçün ən mümkün variant məhz CDU/CSU və SPD-dən ibarətdir. Lakin hər iki tərəf arasında bir sıra ciddi məsələlərdə, o cümlədən miqrasiya siyasəti, borc məhdudiyyəti və Rusiya-Ukrayna müharibəsi kimi mövzularda ciddi fikir ayrılığı olduğundan danışıqların heç də rahat keçməyəcəyi ehtimal edilir.
Fevralın 23-də keçirilmiş federal seçkilərdə 28,52 faiz səslə birinci olan CDU/CSU ittifaqı Bundestaqdakı 630 deputat mandatından 208-nə sahib olub. Seçkilərdə 16,41 faiz səs toplayan SPD isə 120 deputat yerinə malikdir. Hökumətin qurulması üçün parlamentdə ən azı 316 deputat mandatına sahib olmaq lazımdır.
İfrat sağçı Almaniya üçün Alternativ partiyası (AfD) seçkilərdə 20,8 faiz səslə ikinci olsa da, digər partiyaların onunla eyni koalisiyada yer almağı rədd etməsi AfD-nin hökumətdə təmsil olunmaq ehtimalını azaldır.
Elvin Mövsüm
AZƏRTAC-ın xüsusi müxbiri
Berlin
Bölmənin digər xəbərləri
