Almaniyada tətil səbəbindən yüzlərlə aviareys ləğv edilib
Bakı, 16 aprel, AZƏRTAC
“Lufthansa” aviaşirkətində pilotların və uçuş heyətinin tətili dördüncü gün davam etdirməsi səbəbindən cümə axşamı yüzlərlə uçuş ləğv edilib.
AZƏRTAC alman mediasına istinadla xəbər verir ki, pilotlar və stüardessalar birlikdə “Lufthansa”, “Lufthansa Cargo” və “Cityline” regional törəmə şirkətinin əməliyyatlarını pozaraq hava limanlarını tərk ediblər.
Frankfurt aeroportunda aviareyslərin operatoru “Fraport” planlaşdırılan 1313 uçuş və enişdən 656-sının ləğv olunduğunu bildirib. Rəqəmlər bütün aviaşirkətləri əhatə etsə də, ləğvlərin əksəriyyəti “Lufthansa” ilə əlaqəlidir.
Mübahisəni həll etmək səyləri çərşənbə günü “Lufthansa” və pilotların həmkarlar ittifaqı “Vereinigung Cockpit” arasında vasitəçilik danışıqlarının əsas məsələlər üzrə razılığa gəlməməsindən sonra dayandırılıb. Həmçinin bu tətil “Lufthansa”nın 100 illiyini qeyd edən tədbirləri kölgədə qoyub.
Ucuz qiymətə uçuşlar həyata keçirən “Eurowings” aviaşirkətində isə tətil təkcə cümə axşamı günü planlaşdırılır, “Lufthansa” qrupunun digər aviaşirkətlərində isə fasilələr cümə gününə qədər davam edə bilər.
Şirkətin sözçüsü bildirib ki, “Eurowings” planlaşdırılan uçuşlarının 70 faizindən çoxunu həyata keçirir. Lakin onun donanmasının yalnız bir hissəsi Almaniyanın tətil qanununa tabedir.
Bölmənin digər xəbərləri
