Almaniyanın daxili işlər naziri dronlara qarşı müdafiənin gücləndirilməsini təklif edib
Berlin, 27 sentyabr, AZƏRTAC
Danimarka və Norveçdə qeydə alınan dron insidentlərindən sonra Almaniyada da təhlükə risklərinin artması ilə bağlı müzakirələr aparılır.
AZƏRTAC “Tagesschau” xəbər xidmətinə istinadla bildirir ki, daxili işlər naziri Aleksandr Dobrindt yerli mediaya açıqlamasında ölkədə dronlara qarşı müdafiə tədbirlərini daha aydın şəkildə tənzimləmək niyyətində olduğunu bildirib.
Onun sözlərinə görə, hazırlanmış tədbirlər planına əsasən müəyyən hallarda Bundesverə pilotsuz uçuş aparatlarını vurmaq səlahiyyəti verilə bilər.
Nazir vurğulayıb ki, silahlı müdaxilə yalnız insan həyatına və ya kritik infrastruktur obyektlərinə birbaşa təhlükə yarandıqda və digər vasitələr kifayət etmədikdə tətbiq olunacaq. Belə vəziyyətlərdə qərarvermə səlahiyyəti Müdafiə Nazirliyinə aid olacaq. Həmçinin aviasiya təhlükəsizliyinə dair qanuna dəyişiklik edilərək Bundesverin polisə daxildə dəstək göstərməsinə imkan yaradılmasının nəzərdə tutulduğu qeyd olunub.
Plan çərçivəsində hüquqi addımlarla yanaşı, texniki və əməliyyat tədbirlərinin də nəzərdə tutulduğu, xüsusilə aşkarlama, təsnifat və elektron müdafiə vasitələrinin inkişaf etdiriləcəyi bildirilir.
Bundan başqa, hava limanlarının ərazilərinə qanunsuz daxilolmaya görə cəzaların sərtləşdirilməsi məsələsi də müzakirə edilir.
Elvin Mövsüm
AZƏRTAC-ın xüsusi müxbiri
Berlin
Bölmənin digər xəbərləri
