Almaniyanın “Genussmaenner” portalında “Bakı – ənənə müasirliyi qarşılayır” başlığı ilə məqalə çap olunub
Almaniyanın “Genussmaenner” portalında “Bakı - ənənə müasirliyi qarşılayır” sərlövhəli məqalə çap olunub. Məqalədə paytaxt Bakıya səfər etməyin 10 səbəbindən danışılır.
Məqalədə deyilir: Dünyada son illərdə Azərbaycanın paytaxtı Bakı kimi sürətlə dəyişən şəhər yoxdur. Bakıda hələ bir sıra tikinti layihələri sonadək reallaşmayıb. Şəhərin müasir görkəminə “Flame Towers” kompleksi xüsusi gözəllik verir. Onun yaxınlığında qədim İçərişəhər yerləşir. Bir neçə əsrlik tarixi olan tikililərlə XXI əsrin müasir binaları və sovet dövründən qalmış tikililərin bir qisminin yaratdığı təzad paytaxta xüsusi cazibədarlıq verir. Səyahət edilən şəhərlərin siyahısında Bakının da adı var və 31 oktyabr - Dünya Şəhər Günü münasibətilə bu şəhərə getməyin səbəblərini təqdim edirik.
1001 gecə
Tarixi hissə olan İçərişəhərdə XV əsrdən qalmış Şirvanşahlar Sarayı yerləşir. 1192-ci ildə baş vermiş zəlzələ nəticəsində Şamaxı dağılandan sonra Bakı Şirvanşahlar dövlətinin paytaxtına çevrildi. Bakı hazırda da paytaxt funksiyasını yerinə yetirir. Divanxananın qapıları və üzərindəki ərəb əlifbası ilə yazılmış yazılar xüsusilə gözəldir. Saray UNESCO-nun dünya mədəni irs siyahısına daxil edilib. Bundan əlavə, İçərişəhərdə Qız qalası yerləşir.
Müasir memarlıq nümunələri
Müasir Bakının simvolu “Flame Towers”dir. Bulvarda gəzərkən axşamlar saat 20-dən sonra işıqlanan üç qülləni görə bilərsiniz. Dağüstü Parkdan şəhərə gözəl mənzərə açılır və buradan maraqlı şəkillər çəkə bilərsiniz. İran mənşəli məşhur britaniyalı memar Zaha Hadid Bakıda daha bir müasir memarlıq nümunəsini - Heydər Əliyev Mərkəzini yaradıb. Bu nəhəng binada müxtəlif tədbirlərin keçirildiyi salonlar, daimi sərgilər və muzey vardır.
Dənizin sahilində şəhər - 26 kilometrlik bulvar
Azərbaycanın dənizə çıxışı var. Xəzər 371 min kvadratkilometr ərazisi ilə dünyanın böyük duzlu gölüdür. Burada Bakı buxtası yerləşir və liman rolunu oynayır. XX əsrin əvvəllərində sahil boyunca parkı xatırladan ərazi vardı. Bu gün isə bulvar axşam saatlarında dolu olur. Burada kafelər, ticarət mərkəzləri, xalça muzeyi, Muğam Mərkəzi yerləşir. Bulvar tam salınandan sonra 26 kilometrlik ərazini əhatə edəcək.
Alış-veriş və bazarlar
Fəvvarələr meydanının ətrafında alış-veriş etmək üçün dünya brendlərinin mağazaları var. Dəmir Yolu Vağzalının yaxınlığındakı Yaşıl Bazarda təzə meyvə-tərəvəz, meyvə quruları, ədviyyat və ağartı məhsulları ala bilərsiniz. İlin fəslindən asılı olaraq bazarda alıcılara qıpqırmızı nardan tutmuş şipşirin qarpıza qədər məhsullar təklif olunur. İçərişəhərin hər yerində suvenirlər almaq mümkündür.
Barlardan qədim Karvansaraya qədər
Siz Karvansarayda ənənəvi muğam musiqisinə qulaq asa və ya hündürlükdə olan terraslardan alovlanan “Flame Towers”a baxa bilərsiniz. Bakıda hər zövqə uyğun restoranlar və barlar vardır. “Çinar”da Asiya mətbəxinin dadına baxa bilərsiniz. “Landmark” otelindəki “Caspian Grill & Terrace”dən şəhərə gözəl mənzərə açılır. Muğam musiqisi üçün Şirvanşahlar Sarayının restoranına və ya qədim Karvansarayda muğam klubuna getmək olar. Məşhur kafelər içərisində fəvvarələr meydanında Azərbaycan yazıçısının əsərinin adı verilmiş “Əli və Nino” kafesi var. Burada çay evləri çox sevilir. İçərişəhərdəki “Old Baku Tea House”da samovar çayının dadına baxa bilərsiniz.
Yuxu zamanı enerji toplamaq
Beynəlxalq brendlər sayılan “Hilton”, “JW Marriott” və ya “Four Seasons” lüks otelleri Bakıda da vardır. Müasir və xüsusi zövqlə inşa edilən bu otellərdə dincəlmək üçün çox gözəl şərait vardır. Kim “Flame Towers”ə yalnız xaricdən baxmaq istəmir, o zaman “Fairmont Hotel”in cənub qülləsinə yerləşə bilər. Gün ərzində şəhəri gəzib yorulandan sonra otellərin spa salonlarında, eləcə də İçərişəhərin hamamlarında dincələ bilərsiniz.
Minillik tarix
Paytaxtdan 60 kilometr aralıda UNESCO-nun dünya mədəni irs siyahısına daxil edilmiş Qobustan qoruğu yerləşir. 1930-cu ildə burada qayaüstü rəsmlər aşkarlanmışdır. Təxmini hesablamalara görə Qobustan Milli Parkında 6 min qayaüstü rəsm var. Norveç səyyahı Tur Heyerdal vikinqlərin mənşəyinin Azərbaycanda axtarmaqla bağlı şübhələrini sübut etmək üçün 1982-ci ildən Qobustanda tədqiqatlar aparıb. Parkın girişindəki muzey tarixi məqamları izah edir. Eyni zamanda, burada palçıq vulkanlarına da baş çəkmək mümkündür.
Abşeronun daimi alovu
Gün ərzində, çimərlikdə istirahət edəndən sonra Yanardağa gedin. Buranı ziyarət edəndən sonra Azərbaycanın niyə Odlar Ölkəsi adlandığını daha asan başa düşmək mümkündür. Burada təbii şəkildə sönmədən yanan alova xüsusilə qaranlıq düşəndə baxmaq daha füsunkardır.
İlk Avropa Oyunlarının keçiriləcəyi məkan
Bakı 2012-ci ildə “Eurovision” mahnı müsabiqəsi ilə beynəlxalq miqyasda böyük tədbirlərin keçirilməsinə qadir olduğunu göstərdi. 2015-ci ilin iyununda ilk dəfə olaraq birinci Avropa Oyunları məhz Bakıda keçiriləcək. Paytaxtda “Bakı-2015” üçün böyük Olimpiya Stadionundan əlavə müasir idman qurğuları da tikilir. 2015-ci il iyunun 12-dən 28-dək Bakı ilk Avropa Oyunlarına ev sahibliyi edəcək.
Vüqar Seyidov
AZƏRTAC-ın xüsusi müxbiri
Berlin
Bölmənin digər xəbərləri
