Almaniyanın “Rheinmetall” konserni Rumıniyadan yeni hərbi sifariş alıb
Almaniyanın müdafiə-sənaye konserni “Rheinmetall” Rumıniyadan yerüstü hava hücumundan müdafiə sahəsində növbəti iri sifariş alıb.
AZƏRTAC xəbər verir ki, şirkətin məlumatına görə, Rumıniya hökuməti “Rheinmetall”a “Skyranger 35” tipli zenit-raket-artilleriya sistemlərinin tədarükünü həvalə edib. Sifariş ümumi dəyəri 5,7 milyard avro olan və döyüş maşınları, hərbi gəmilər, eləcə də hava hücumundan müdafiə vasitələrini əhatə edən genişmiqyaslı proqramın tərkib hissəsidir.
Müqavilə çərçivəsində 24 “Skyranger 35” sistemi, 7 “Skynex” sistemi və hava hücumundan müdafiə məqsədilə 2 “Millennium” artilleriya qurğusunun çatdırılması nəzərdə tutulur.
“Skyranger 35” sistemləri “Rheinmetall”ın KF41 “Lynx” zirehli platforması üzərində quraşdırılacaq. Şirkət bu sifarişin mobil hava hücumundan müdafiə həlləri sahəsində Avropanın aparıcı sistem təchizatçılarından biri kimi mövqeyini daha da möhkəmləndirdiyini bildirib.
Şirkətin məlumatında qeyd olunub ki, layihə Rumıniya Silahlı Qüvvələrinin modernləşdirilməsi, ölkə ərazisinin müdafiəsinin gücləndirilməsi və NATO-nun şərq cinahının təhlükəsizliyinin artırılması məqsədlərinə xidmət edir.
“Skyranger 35” yüksək dəqiqlikli 35 millimetrlik top, müasir radar və elektrooptik izləmə sistemləri ilə təchiz olunub. Sistem xüsusilə pilotsuz uçuş aparatları, dronlar və digər yaxınmənzilli hava təhdidlərinə qarşı mübarizə üçün nəzərdə tutulub.
Bölmənin digər xəbərləri
