ALMATIDA MDB MƏDƏNİ ƏMƏKDAŞLIQ ŞURASININ 23-CÜ İCLASI KEÇİRİLMİŞDİR
AZƏRTAC-ın xüsusi müxbiri xəbər verir ki, Almatıda Müstəqil Dövlətlər Birliyi (MDB) Mədəni Əməkdaşlıq Şurasının 23-cü iclası keçirilmişdir.
İclası Şuranın sədri, Azərbaycanın mədəniyyət və turizm naziri Əbülfəs Qarayev açaraq bildirmişdir ki, gündəliyə səkkiz məsələ çıxarılmışdır. Onların arasında MDB-nin Mədəni Əməkdaşlıq Konsepsiyasının layihəsi, Birliyin elm və yaradıcı ziyalılarının 2-ci Forumunun qətnamələri - “Teatr, kino, musiqi, sirk sənəti”, həmçinin “Mədəni irs” palatalarının tövsiyələri, mədəniyyət sahəsində qanunvericiliyin inkişaf perspektivləri, Böyük Vətən müharibəsində qələbənin 65-ci ildönümünün qeyd olunması ilə əlaqədar Tədbirlər Planı və digər məsələlər vardır.
Sonra iclasın gündəliyində duran məsələlər ətraflı müzakirə edilmiş, razılaşmalar əldə olunmuşdur.
Əbülfəs Qarayev demişdir ki, bu cür görüşlər humanitar sahədə əməkdaşlığın dərinləşməsinə, mədəniyyətin inkişafı ilə bağlı mürəkkəb məsələlərin birgə həllini tapmaq üçün vahid strategiyanın hazırlanmasına imkan yaradır.
Azərbaycanın mədəniyyət və turizm naziri qeyd etmişdir ki, bu il dekabrın 2-3-də Bakıda Avropa Ölkələri mədəniyyət nazirlərinin müşavirəsi keçiriləcəkdir. Avropa Şurası ilə Azərbaycan hökumətinin birgə keçirəcəkləri bu müşavirəyə ilk dəfə olaraq İslam Konfransı Təşkilatının üzvü olan on ölkə də dəvət edilmişdir. Həmin ölkələrin arasında Qazaxıstan, Özbəkistan, Türkmənistan və Tacikistan da vardır.
Bölmənin digər xəbərləri
