ALMATIDA OLJAS SÜLEYMENOVUN 70 İLLİK YUBİLEYİ MÜNASİBƏTİLƏ POEZİYA GECƏSİ KEÇİRİLMİŞDİR

20.05.2006 [16:36]
Çap et
A⁺ A^-

AZƏRTAC-ın xüsusi müxbiri xəbər verir ki, Almatıdakı Pespublika sarayında tanınmış şair və ictimai xadim Oljas Süleymenovun 70 illik yubileyi münasibətilə poeziya gecəsi keçirilmişdir.

Tədbiri Almatı şəhərinin hakimi İmanqali Tasmaqambetov açaraq Qazaxıstan Prezidenti Nursultan Nazarbayevin yubilyara ünvanlanmış təbrikini oxumuş, Oljas Süleymenovun Qazaxıstanın müstəqilliyinin əldə olunmasında rolundan danışmış, onu zəmanəmizin böyük şair və ictimai xadimlərindən biri olduğunu qeyd etmişdir.

Azərbaycanın Qazaxıstandakı səfiri Lətif Qəndilov Oljas Süleymenovun “Şöhrət” ordeni ilə təltif olunması haqqında Azərbaycan Prezidenti İlham Əliyevin Sərəncamını və təbrik məktubunu oxumuşdur.

Ukraynanın Almatıdakı baş konsulu Sergey Şidlovski ölkəsinin Prezidenti adından şairə Yaroslav Mudrı ordenini təqdim etmişdir. Tatarıstan Prezidenti Mintimer Şaymiyevin şəxsi hədiyyəsi də şairə verilmiş, yaxın və uzaq xarici ölkələrdən yubilyara ünvanlanmış təbrik teleqramları oxunmuşdur.

Yubiley gecəsində Oljas Süleymenov müxtəlif illərdə yazdığı şeirlərini oxumuşdur.