Altı ayda Qəbələdə 4590 baş inək və düyə süni yolla mayalandırılıb
Qəbələ, 10 iyul, Mustafa Dadaşov, AZƏRTAC
Qəbələdə heyvandarlıq əsas təsərrüfat sahələrindən biridir. Dövlətin aqrar bölmənin digər sahələri ilə yanaşı, heyvandarlığın inkişafına göstərdiyi hərtərəfli qayğı, son məhsula və bala alımına görə maldarlara verdiyi əlavə subsidiyalar rayonda bu sahənin inkişafına güclü təkan verib. Son illər heyvandarlar süni mayalandırma yolu ilə inəklərin cins tərkibinin dəyişdirilərək daha məhsuldar heyvanlarla əvəz edilməsində çox maraqlıdırlar. Belə ki, 2021-ci ilin 6 ayında rayonun şəxsi və fermer təsərrüfatlarında 4590 baş inək və düyə süni yolla mayalandırılıb. Həmin müddətdə təsərrüfatlarda süni mayalanma yolu ilə 2367 baş cinsi yaxşılaşdırılmış buzov alınıb.
Bu barədə AZƏRTAC-ın bölgə müxbirinə Qəbələ rayon Statistika İdarəsindən məlumat verilib.
Bildirilib ki, heyvanların cins tərkibinin yaxşılaşdırılması heyvandarlıq məhsulları istehsalının artmasına da müsbət təsir göstərir. Belə ki, cari ilin birinci yarısında rayonda 2 min 32,2 ton diri çəkidə ət, 20 min 669,3 ton süd, 11 milyon 492 min ədəd yumurta, 314,5 ton yun istehsal olunub. 2021-ci il iyulun 1-i vəziyyətinə rayonun təsərrüfatlarında 43 min 965 baş iribuynuzlu mal-qara, o cümlədən 21 min 773 baş inək və camış, 178 min 333 baş qoyun və keçi, 739 baş donuz mövcud olub.
Bölmənin digər xəbərləri
