Altı beynəlxalq şirkət Liviyada neft-qaz kəşfiyyatı sahəsində tenderin qalibi olub
Qahirə, 11 fevral, AZƏRTAC
Liviya ABŞ-ın “Chevron”, “Türk Petrollerı Anonim Ortaklığı”, “İtaliyanın “Eni” və “QatarEnergy” şirkətləri də daxil olmaqla altı beynəlxalq şirkətə neft və təbii qaz kəşfiyyatı və istehsalı üzrə lisenziya verib. Bu, Liviyanın 17 ildən sonra xarici şirkətlərə neft-qaz sahəsində təqdim etdiyi ilk lisenziyadır.
AZƏRTAC xəbər verir ki, bu barədə Liviya Milli Neft Korporasiyasının bu gün açıqladığı bəyanatda deyilir. Ölkədə 2011-ci ildən bəri baş verən geosiyasi qeyri-sabitlik və daxili münaqişələr səbəbindən son on ildə hasilat çox məhdud olub.
Liviya son tenderdə şirkətlərə təxminən 22 blok (11-i dənizdə yerləşir) təklif edib. Bu sahələrdə təxminən 10 milyard barel təsdiqlənmiş ehtiyatla yanaşı, kəşf edilməmiş 18 milyard barel ehtiyat olduğu bildirilir.
Tenderin nəticələrinin açıqlandığı bugünkü tədbirdə Liviya Milli Birlik Hökumətinin Baş naziri Əbdülhəmid Dbeybe, neft və qaz ehtiyatları naziri Xəlifə Əbdüssadiq, Liviya Milli Neft Korporasiyasının prezidenti Məsud Süleyman və bir sıra beynəlxalq enerji şirkətlərinin təmsilçiləri iştirak ediblər.
Tədbirdə çıxışında Liviyanın Milli Neft Korporasiyasının rəhbəri Məsud Süleyman bildirib ki, cari il ərzində neft-qaz kəşfiyyatı sahəsində yeni tender də elan ediləcək.
Şıxəli Əliyev
AZƏRTAC-ın xüsusi müxbiri
Qahirə
Bölmənin digər xəbərləri
