Altıağac Milli Parkının yaradılmasından 19 il keçir
Bakı, 31 avqust, AZƏRTAC
31 avqust - Altıağac Milli Parkının yaradılması günüdür.
AZƏRTAC xəbər verir ki, həmin xüsusi mühafizə olunan təbiət ərazisi ətraf mühitin mühafizəsi, bioloji müxtəlifliyin saxlanılması və ekoturizmin inkişaf etdirilməsi məqsədilə Azərbaycan Respublikası Prezidentinin 2004-cü il 31 avqust tarixli Sərəncamı ilə yaradılıb.
Böyük Qafqazın ətəklərində - Xızı və Siyəzən rayonlarının ərazisində yerləşən milli parkın sahəsi 11 min 35 hektardır.
Altıağac Milli Parkının ərazisi dağ meşəsi, dağ çəmənlikləri, yarımsəhra, meşə çölü landşaftından ibarətdir.
Milli parkda flora növlərindən palıd, vələs, göyrüş, yemişan, zirinc, ağıriyli ardıc, Qafqaz bənövşəsi, itikənarlı süsən və s., fauna növlərindən isə qonur ayı, vaşaq, Avropa cüyürü, saqqallı quzugötürən, canavar, çöl donuzu, bildirçin, yenot, dovşan, tülkü, dələ, qaratoyuq və s. rast gəlinir.
Qeyd edək ki, bu gün Altıağac Milli Parkının yaranması günü ilə əlaqədar milli parkda “Açıq qapı” günü keçirilir.
Hazırda ölkəmizdə sahəsi 893 min hektar olan 10 dövlət təbiət qoruğu, 10 milli park və 24 dövlət təbiət yasaqlığını əhatə edən xüsusi mühafizə olunan təbiət əraziləri şəbəkəsi fəaliyyət göstərir. Ötən il milli parkları 276 mindən çox turist ziyarət edib.
Bölmənin digər xəbərləri
