AMERİKALILAR EV HEYVANLARINA İLDƏ 30 MİLYARD DOLLAR SƏRF EDİRLƏR
Adel Dennis bu işlə 13 ildir ki məşğul olur, gündə 15-ə yaxın it-pişik gəzdirir. Deyir ki, heyvanın bir dəfəlik gəzinti haqqı 15 dollardır. Hərdən heyvanların sahibləri şəhərdən kənara gedəndə dördayaqlı dostlarını Adelin yanında gecələməyə qoyurlar. Bu halda, xidmət haqqı bir gecəyə 50 dollar təşkil edir.
Statistikaya əsasən, ev itləri və pişiklərinin sayına görə ABŞ dünyada birinci yeri tutur. Dəqiq desək, bu ölkədə ev heyvanlarının sayı 140 milyondur. Bunun 78 milyonu pişiklərin payına düşür. Qalanların arasında isə təkcə itlər deyil, ekzotik heyvanlar da var.
Şimali Karolina ştatındakı “Dost lələkləri” adlı şirkətin sahibi Riçard Parsons nadir quşlar yetişdirir. O deyir: “Məncə, başqa millətlərə nisbətən amerikalılar ev heyvanlarına daha ciddi yanaşırlar. Bəlkə ona görə ki, bizim şəraitimiz və rahatçılığımız daha yaxşıdır. Mənim elə müştərilərim var ki, evində 50-yə yaxın quş saxlayır. Bəzi insanlar bir quşa görə 30 min dollar ödəməyə hazırdırlar. Quş yeməklərinə isə, ildə 3 min dollar xərcləyirlər. Çünki lələklilərin ləzzətlə yediyi qoz-fındıqlar ucuz olmur. Quşbazlar öz quşlarına fanatikcəsinə yanaşırlar”.
Birləşmiş Ştatlar ev heyvanları qidasının yalnız ən böyük istehlakçısı deyil, həm də ən böyük istehsalçısıdır. Amerikalılar heyvanların yeməyinə, onlara qulluq edilməsinə ildə təxminən 30 milyard dollar vəsait sərf edirlər.
ABŞ qanunları heyvanların hüquqlarını müdafiə edir. Mövcud qanunvericiliyə görə, heyvanlarla qəddarcasına rəftar etmək qadağandır. Heyvanlarını ictimai yerlərdə nəzarətsiz qoyanlar, başlı-başına buraxanlar və ya onlara qarşı zorakılıq edənlər qanunla məsuliyyətə cəlb olunur və ya cərimələnirlər.
Heyvanlara qayğı göstərmək, ətraf mühiti təmiz saxlamağı da nəzərdə tutur. Şəhər hakimiyyəti rəsmiləri ev heyvanları sahiblərini dördayaqlı dostları gəzdiyi yerləri təmizləməyi məsləhət görürlər. Buna riayət etməyən, 100 dollar cərimələnəcəkdir.
ABŞ-da uşaqları erkən yaşlarından heyvanlara qayğı göstərməyə öyrədirlər. On minlərlə balacalar xüsusi təhsil proqramları vasitəsilə heyvanlarla tanış olur, onları anlamağa və hörmət etməyə öyrənirlər. Belə təmaslar uşaqların qəlbində xeyirxahlıq, məhəbbət və qayğıkeşlik hissi yaradır. Bunlar isə həyatda həmişə lazım olan keyfiyyətlərdir.
