Amin Məmmədov: Uşaqlarda ekoloji təfəkkürün erkən yaşlardan formalaşdırılması strateji əhəmiyyət daşıyır
Bakı, 8 dekabr, Pərvanə Qafarova, AZƏRTAC
Azərbaycanda ətraf mühitin qorunması və iqlim dəyişiklikləri ilə mübarizə son otuz ilə yaxın müddətdə dövlət siyasətinin əsas prioritet istiqamətlərindən biridir. Bu sahədə maarifləndirmə həlledici rol oynayır və ekoloji biliklərin balaca yaşlarından formalaşdırılması xüsusi əhəmiyyət kəsb edir.
Bu barədə AZƏRTAC-a açıqlamasında “Environmental Protection First” (EPF) Koalisiyasının həmtəsisçisi, Ekologiya və Təbii Sərvətlər Nazirliyi yanında İctimai Şuranın sədri Amin Məmmədov bildirib.
Amin Məmmədov vurğulayıb ki, məktəbəqədər və ibtidai siniflərdən başlayaraq uşaqlara ətraf mühitin qorunması ilə bağlı düzgün vərdişlərin aşılanması gələcək nəsillərin məsuliyyətli ekoloji davranışının formalaşmasına mühüm töhfə verir. Bu məqsədlə Ekologiya və Təbii Sərvətlər Nazirliyi, digər dövlət qurumları və vətəndaş cəmiyyəti institutları ilə sıx əməkdaşlıq həyata keçirilir.
Onun sözlərinə görə, qeyri-hökumət təşkilatları və media ilə birlikdə icra olunan layihələr maarifləndirmə prosesini daha da gücləndirir və daha geniş auditoriyanı əhatə edir. “Məqsəd ondan ibarətdir ki, uşaqlar böyüdükcə ətraf mühitə sevgi və qayğı ilə yanaşsınlar, ekoloji dəyərlər onların həyat tərzinin təbii bir hissəsinə çevrilsin”, – deyə Amin Məmmədov əlavə edib.
Bölmənin digər xəbərləri
