Anatoli Raxanski: Azərbaycanda parlament seçkiləri yüksək səviyyədə keçəcək
Kiyev, 24 oktyabr, AZƏRTAC
“Ukrayna Ağsaqqallar Şurası” ictimai birliyinin sədri Anatoli Raxanski əmindir ki, Azərbaycan Milli Məclisinə noyabrın 1-nə təyin edilmiş seçkilər azad, şəffaf və demokratik şəraitdə keçəcək.
Ukraynanın tanınmış siyasətçisi bu fikri AZƏRTAC-ın müxbirinə müsahibəsində deyib.
A.Raxanski qeyd edib ki, 2003, 2008 və 2013-cü illərdə Azərbaycanda Prezident seçkilərində, Azərbaycan Respublikası Konstitusiyasına dəyişikliklər edilməsinə dair ümumxalq referendumunda beynəlxalq müşahidəçi olub. O deyib: “Çoxsaylı müşahidələrimi nəzərə alaraq əminəm ki, bu parlament seçkiləri də şəffaf, demokratik şəraitdə keçəcək və Azərbaycan xalqı ölkənin ali qanunverici orqanına layiqli, savadlı, təcrübəli nümayəndələrini seçəcək”. Siyasətçinin sözlərinə görə, o, Azərbaycanda hər seçki kampaniyasından sonra həm bu ölkədə, həm də öz vətənində mətbuatda məqalələr dərc etdirib, televiziya və radio verilişlərində çıxış edib. A.Raxanski deyib: “Mən KİV-də Azərbaycan seçicilərinin yüksələn fəallığını, ölkədə ictimai-siyasi sabitliyi qeyd etmişəm. 2013-cü ildə seçicilər fəal, ruh yüksəkliyi, sabaha tam əminliklə Prezident seçkilərində iştirak ediblər”. O vurğulayıb ki, xalqın dəstəyini onunla bir yerdə olmaqla qazanmaq olar. Prezident İlham Əliyev bunu təsdiq etdi. Səsvermədə iştirak edən seçicilərin əksəriyyəti ona səs verdilər.
Siyasətçi vurğulayıb: “Mənə xoşdur ki, proqnozlarım ölkələrdə sosial sorğu keçirən mərkəzlərin proqnozu ilə üst-üstə düşür. Xatırladım ki, Amerikanın nüfuzlu “Arthur J. Finkelstein & Associates” ictimai rəyin öyrənilməsi beynəlxalq mərkəzi Azərbaycan əhalisi arasında qarşıdan gələn parlament seçkiləri ilə bağlı keçirdiyi sorğunun nəticələrini açıqlayıb. Məlumatda bildirilir ki, seçicilərin təxminən 80 faizi Azərbaycanın hazırkı hakimiyyət orqanlarının rəhbərliyi altında düzgün istiqamətdə irəlilədiyini təsdiq edir. Seçicilərin 74,4 faizi hakimiyyətdə olan Yeni Azərbaycan Partiyasına səs vermək niyyətindədir. Rəyi soruşulanların 82,1 faizi Prezident İlham Əliyevin fəaliyyətini “yaxşı” və “əla” qiymətləndiriblər. Bu sorğunun nəticələri Azərbaycan əhalisinin ölkə hakimiyyətini dəstəklədiyini göstərir”. A.Raxanski Azərbaycanda iqtisadi və siyasi sabitliyi, şəhər və kəndlərin abadlaşdırılmasını, xalqın həyat səviyyəsinin daha da yaxşılaşdırılmasını, yoxsulluğun azaldılmasını xüsusilə qeyd edib. Onun sözlərinə görə, Azərbaycan Bakı Beynəlxalq Humanitar Forumu, Birinci Avropa Oyunları və digər beynəlxalq tədbirlərin yüksək səviyyədə keçirilməsini təmin edir. A.Raxanski diqqətə çatdırıb ki, Bakı Beynəlxalq Humanitar Forumunda iki dəfə iştirak edib.
Ukraynalı siyasətçi sonda deyib: “Əminəm ki, noyabrın 1-də Azərbaycanın qanunverici orqanına seçkilər yüksək səviyyədə keçəcək”.
Zeynal Ağazadə
AZƏRTAC-ın xüsusi müxbiri
Kiyev
Bölmənin digər xəbərləri
