Anna Pavlova: Avropa Oyunlarına hazırlığın nə qədər ciddi olduğunu görürəm
Bakı, 2 mart, AZƏRTAC
Bakıda keçiriləcək birinci Avropa Oyunlarının proqramına daxil olan idman növlərindən biri də qadın idman gimnastikasıdır. Olimpiya idman növü olan gimnastika yarışlarında Azərbaycanı 3 atlet təmsil edəcək. Onlar 6 cüt medal uğrunda - komanda hesabı, şəxsi birincilik, həmçinin ayrı-ayrı finallar - tir üzərində hərəkətlər, müxtəlif hündürlüklü qollar, dayaqla tullanma və sərbəst hərəkətlərdə mübarizə aparacaqlar.
AZƏRTAC Azərbaycan Gimnastika Federasiyasının mətbuat xidmətinin Oyunların mümkün iştirakçısı A.Pavlova ilə müsahibəsini təqdim edir.
- Gimnastikaya gəlişiniz haqda danışın. Necə oldu ki, məhz idmanın bu növünü seçdiniz?
- Valideynlərim gimnastika üzrə məşqçidirlər və mən zalda böyümüşəm. Xüsusi seçimim yox idi və dörd yaşımdan məşq etməyə başladım.
- Necə düşünürsünüz, idmanın başqa sahəsində uğurlu ola bilərdinizmi?
- Özümü başqa sahələrdə sınamaq üçün şansım var idi. Əsasən, musiqi və şahmatla məşğul olurdum. Daha sonra məktəbə getdim və ikinci növbədə idim. Mən seçim qarşısında idim və gimnastikanı seçdim. Bu, mənim seçimim idi. Anam və nənəm buna qarşı idilər, məni rəqsə yazdırmaq istəyirdilər. Lakin bu, məni çox qıcıqlandırırdı. Uşaqlıqda bəyənməsəm də, böyüdükcə rəqsə daha loyal yanaşmağa başladım.
- Yarış günü emosiyalarınızla necə bacarırsınız? Təmkinli olmağınızın sirri nədədir?
- Fərqli olaraq. Hər problemin həllində onun mənbəyinə qayıtmaq lazımdır. Təhlillər apardıqca hər şeyi dərk edirsən. Bəzən alınmasa da, artıq bununla heç nə etmək olmur.
- Fikrinizcə, idmanın hər hansı növündə vacib olan nədir?
- Öz üzərində çalışmaq və məqsədə doğru getmək.
- Peşəkar idmanla məşğul olmaq nə dərəcədə təhlükəlidir? Yoxsa bu, idmanın növündən asılıdır?
- Heç bir peşəkar idman insana sağlamlıq vermir. Lakin tamamilə fərqli şeylər verir. Sağlamlıq üçün bədən tərbiyəsi ilə məşğul olmaq lazımdır. Gimnastikanın üstün cəhətlərindən biri odur ki, rəqibin yoxdur, necə məşq etmisənsə, o cür də çıxış edəcəksən. Ümumi gimnastika insan sağlamlığı üçün əhəmiyyətlidir. Böyük idman səyahət imkanları, ad və həyat tərzi qazanmaq şansı verir. Mən təsəvvür edə bilmirəm ki, idman karyeramı bitdikdən sonra nə işlə məşğul olacağam. Məşqçi kimi davam etmək şansım var, lakin bu addımı atmağa hələ hazır deyiləm. Daim hərəkətdə olmağa, tanımadığım ölkələrə səyahət etməyə öyrəşmişəm.
- İdmanda kumiriniz varmı?
- Xeyr. Nailiyyətlərinə görə hörmət etdiyim şəxslər var. Təqlid etməyi düzgün saymıram.
- Yaxın gələcək üçün idman planlarınızdan danışın.
- Zədəmi nəzərə alaraq, nə isə planlaşdırmaq hazırda mənə çətindir. İndi bir məqsədim var - ayağımı müalicə etmək və Avropa Oyunları haqda düşünmək. Məhz Oyunlara görə bərpa olunmağı qərara aldım və üç ildir ki, işləyirəm. Çox yaxşı formada olmaq istəyirəm. İki ay öncə əməliyyat edilsəm da, hər şey lazımı kimi olmadı. Zədədən sonra mənə sağalmağımın çətin olacağını demişdilər. Özümə də maraqlı idi, bacara biləcəyəmmi ya yox. Karyeramı davam etdirməyin nə qədər perspektivli olmasına Avropa Oyunlarından sonra baxacağıq. Lakin gündən-günə çətinləşir. Buna özüm üçün qərar verməliyəm, çünki bir müddət sonra Rio-de-Janeyroda təşkil ediləcək Olimpiadaya lisenziya qazanmaq şansımın olduğu dünya çempionatı keçiriləcək.
- Avropa Oyunları sizin üçün necə əhəmiyyət kəsb edir? Bu Oyunlara necə hazırlaşırsınız?
- İlk dəfə karyeramı bitirdikdən sonra Bakıya gəldim. Bura mənim çox xoşuma gəldi və üç il burada qalmağı qərara aldım. Universiadada iştirak edə bilmədim, məşqçilər icazə vermədilər. Bundan sonra isə zədədən əziyyət çəkdim. Düşünürəm ki, Avropa Oyunları da universiadaya bənzəyir, burada da gimnastikanın növləri təmsil olunacaq. Mən bu yarışlara hazırlığın nə qədər ciddi olduğunu görürəm. Mənim üçün çox maraqlıdır, ona görə də bu yarışlarda özümü sınamaq istərdim.
- İdmandan bir az uzaqlaşsaq, reallaşdırmaq istədiyiniz başqa arzularınız, məqsədləriniz varmı?
- Düzü, heç bilmirəm. Konkret olaraq arzularım yoxdur, lakin idmandan sonra özümü təsdiq etmək istərdim. İdman çox gözəldir. İdmanda çox şey qazandım, lakin o başa çatır. Bundan sonra özünü başqa sahədə tapmalısan. Misalüçün, məşqçilik peşəsi məni cəlb edir. Burada özümü sınamasam olmaz, uşaqlara təlim keçmək istərdim.
- İdmanla gündəlik həyatınızı birləşdirə bilirsinizmi?
- Mən idmanla yaşayıram, özümü bu sahədən kənarda təsəvvür edə bilmərəm. Bu, elə mənim adi həyatımdır.
- Adətən azarkeşləriniz tribunalardan sizi necə dəstəkləyirlər? Onlardan nəyi eşitmək istərdiniz?
- Onlar məni dəstəklədikcə çox sevinirəm. Ən adi sözlər belə mənə güclü təsir edir.
- Onlara nə demək istərdiniz?
- Demək istərdim ki, onların dəstəyi hər idmançı üçün vacibdir. Bu yaxınlarda Meksikada yarışda nümunəvi çıxışlarda olmuşdum. Orada bizi çox səmimi və isti qarşıladılar. Azarkeşlər dəstəkləyir, biz də müsbət enerji alırdıq. Bizi dəstəkləyən hər kəsə təşəkkürümü bildirirəm.
Bölmənin digər xəbərləri
