Aqil Məlikov: Əlibaba Məmmədovun zəngin yaradıcılığı uzun illər yaddaşlarda qalacaq
Bakı, 13 fevral, Gülay Nəzərova, AZƏRTAC
Görkəmli xanəndə, Xalq artisti Əlibaba Məmmədovla bağlı çoxlu xatirələrim var. Onu ilk dəfə 20 yaşım olanda tanımışam. Biz 10 il Azərbaycan Milli Konservatoriyasında bir yerdə çalışmışıq. Əlibaba Məmmədovun mahnıları bu gün də dillər əzbəridir. Hətta bəzi mahnılarının sözlərini də özü yazırdı. O, istedadlı xanəndə və əsl müəllim idi.
Bu fikirləri AZƏRTAC-a açıqlamasında Əməkdar incəsənət xadimi Aqil Məlikov deyib.
O qeyd edib ki, sənətkarın mahnılarının yaranma tarixini yaxşı bilir və vaxtilə onun ansamblında fəaliyyət göstərib: “Hər dəfə yeni bir mahnı ilə gələrdi, deyərdi ki, “uşaqlar, təzə bir əsər yazmışam, gəlin məşq edək”. Bu gün dillər əzbəri olan bir çox mahnılar məhz həmin dövrdə yaranıb. “Şadlanasan, güləsən”, “Qısqanıram”, müxtəlif təsniflər və digər əsərlər onun zəngin yaradıcılığının məhsuludur. Çox məhsuldar sənətkar idi, daim yazır, yaradırdı”.
A.Məlikov vurğulayıb ki, bu gün də onun mahnıları, təsnifləri və ifaları yaşayır: “Əlibaba Məmmədov elə bir irs qoyub ki, sənət aləmində bundan sonra da uzun illər yaşayacaq”.
Bölmənin digər xəbərləri
