ARAZ ÇAYI SAHİLLƏRİNDƏ QUŞLARIN TƏLƏFATI BARƏDƏ YAYILAN MƏLUMATLAR ƏSASSIZDIR

26.10.2006 [14:14]
Çap et
A⁺ A^-

Son günlər bəzi kütləvi informasiya vasitələrində Araz çayı sahillərində çöl quşlarının kütləvi tələfatı barədə müxtəlif məlumatlar yayılır. Bu məlumatları yerindəcə araşdırmaq məqsədi ilə oktyabrın 19-dan 25-dək Dövlət Baytarlıq Xidməti, Naxçıvan Muxtar Respublikası Kənd Təsərrüfatı Nazirliyi yanında Dövlət Baytarlıq Xidməti, həmin bölgənin rayon baytarlıq xidmətləri və muxtar respublikanın Ekologiya və Təbii Sərvətlər Nazirliyi əməkdaşlarının iştirakı ilə Araz çayı sahillərində monitorinq keçirilmişdir.

Dövlət Baytarlıq Xidmətinin mətbuat mərkəzindən AZƏRTAC-a bildirmişlər ki, Araz çayının əhatə etdiyi ərazilərə hələ köçəri quşların miqrasiyası başlamamışdır. Buna baxmayaraq, şayiələrə rəvac verməmək üçün həmin ərazilərdə bir daha monitorinq aparılması məqsədəuyğun sayılmışdır.

Monitorinq zamanı Araz çayı sahillərinə, o cümlədən xırda gölməçələrə diqqət yetirilmiş, bu ərazilərdə yaşayan sakinlərlə söhbətlər aparılmışdır. Heç kim ölkəmizin Araz çayı sahillərindəki ərazilərdə quş cəsədinə rast gəlməmişdir. Beləliklə, kütləvi informasiya vasitələrində yayılmış bu xəbərlər həqiqətdən uzaqdır və heç bir rəsmi məlumata əsaslanmamışdır.

Dövlət Baytarlıq Xidməti əhalini belə yanlış məlumatlara inanmamağa çağırır.