ARGTMŞ “Xocalı soyqırımı-20” adlı silsilə tədbirlərə başlamışdır
Bakı, 21 fevral (AZƏRTAC). Azərbaycan Respublikası Gənclər Təşkilatları Milli Şurası (ARGTMŞ) hər il olduğu kimi, Xocalı soyqırımının 20-ci ildönümü ilə bağlı bir sıra tədbir keçirəcəkdir.
Milli Şuranın baş katibi Orxan Ərəbovun AZƏRTAC-a verdiyi məlumata görə, belə tədbirlərdən biri Şuranın Azərbaycan Respublikası Qaçqınların və Məcburi Köçkünlərin İşləri üzrə Dövlət Komitəsi ilə birgə hazırladığı “Böyük qayıdış” filminin təqdimatı olacaqdır.
Bir gəncin gözü ilə Dağlıq Qarabağın işğaldan azad olunmasından sonra repatriasiya prosesindən bəhs edilən bu filmin Azərbaycandan kənarda da nümayiş etdirilməsi nəzərdə tutulur. Filmdə ölkəmizin tarixi əraziləri haqqında geniş məlumat verilir.
Həmçinin ARGTMŞ 100-dən çox beynəlxalq təşkilatın, ölkəmizdə akkreditasiya olunmuş diplomatik korpusun və müxtəlif xarici qurumların elektron ünvanlarına Xocalı soyqırımı haqqında müxtəlif dillərdə məlumatlar da göndəriləcəkdir.
Tədbirlər çərçivəsində ARGTMŞ, Demokratik İslahatçı Gənclər İctimai Birliyi və Azərbaycan Respublikasının Prezidenti yanında QHT-lərə Dövlət Dəstəyi Şurasının birgə layihəsi olan Xocalı soyqırımından bəhs edən “Kimdir günahkar” adlı filminin də təqdimat mərasimi keçiriləcəkdir.
Həftənin sonunda isə Şura tərəfindən Dənizkənarı Milli Parkda Xocalı soyqırımına dəstək aksiyasının keçirilməsi planlaşdırılır.
Bölmənin digər xəbərləri
