Arif Əsədov: Futbolumuzun inkişafı üçün problemləri kökündən həll etmək lazımdır
Bakı, 15 yanvar, AZƏRTAC
“Düşünürəm ki, bu, Azərbaycan futbolu üçün xeyirli layihədir”.
Bu sözləri AZƏRTAC-a açıqlamasında veteran futbolçu Arif Əsədov AFFA-nın yeni inkişaf strategiyası ilə bağlı danışarkən deyib.
Mütəxəssis layihədə yer alan bəndlərdə ən çox diqqətini cəlb edən məqamları qeyd edib: “Bölgələrdə akademiyaların yaradılması, stadionların tikilməsi və bərpası, innovativ mərkəzin qurulması, məşqçi və futbolçuların təkmilləşməsi üçün işlərin görüləcəyinə dair bəndlər futbolumuzun inkişafını təkan verə bilər. Ən vacibi sadalananları icra etməkdir. Futbolumuzdakı problemləri həll etmək üçün bu məsələlərə ədalət və vicdanla yanaşmaq lazımdır. AFFA rəhbərliyi bunu demokratik şəkildə həyata keçirmək istəyir. Bu strategiyanın yaradılmasında demokratik prinsiplərdən istifadə olunub. Burada həm ictimaiyyətin, həm futbol adamlarının, həmçinin bir çox qurumların fikirləri önəmlidir. Məsələlərə AFFA tərəfindən diqqət yetirilib. Qurumlara öz təkliflərini irəli sürmək üçün əlavə vaxt da verilmişdi. Bu da onu göstərir ki, strategiyanın həllində və yerinə yetirilməsində qurumların komplektləşdirilmiş fikirləri mühüm əhəmiyyət kəsb edir. Lakin bütün bu sadalananlar kağız üzərində qalmamalı, bunları reallaşdırmaq üçün çoxlu kadrlar və mütəxəssislər cəlb olunmalıdır. Hətta problemləri həll etmək, hədəfləri yerinə yetirmək üçün ölkəmizə əcnəbi mütəxəssislər də dəvət oluna bilər”.
O, Azərbaycan futbolunun əsas problemlərindən də bəhs edib: “Futbolumuzda əsas problem akademiyaların azlıq təşkil etməsi, infrastrukturun lazımi şəkildə olmaması, uşaq futboluna diqqətin az olmasıdır. Yaxşı formada olan futbolçularımızın əksəriyyəti 19 yaşdan sonra eniş dövrlərini yaşayırlar. Buna görə də problemləri kökündən həll etmək lazımdır. Yəni birbaşa əsas yığmanın nəticələrinin yaxşılaşdırılması üçün addımlar atılmamalı, problemin özəyini tapıb, onun üzərində işləmək lazımdır. Təbii ki, layihədə milli komandaların inkişafı üçün də müxtəlif tələblər qoyulub. Amma əsas prioritet aşağı yaş qruplarına diqqətin artırılması, infrastrukturun yaxşılaşdırılması, klublarımızın tam formalaşmasına diqqət yetirmək və yaxşı mütəxəssislərin yetişdirilməsidir. Hər kəs öz məsuliyyətini dərk etməli, işinə vicdanla yanaşmalıdır. Bu, təkcə AFFA-nın işi deyil. Elm və Təhsil Nazirliyi, Gənclər və İdman Nazirliyi də məsələlərin həlli üçün səylər göstərməlidirlər”.
Bölmənin digər xəbərləri
