Kənd Təsərrüfatı Nazirliyinin heyvandarlıq məhsullarının istehsalı, emalı, damazlıq işi və otlaqlar şöbəsinin müdiri Çingiz Fərəcov
AZƏRTAC-a bildirmişdir ki, artıq Azərbaycanda da heyvan bədəninə embrion köçürülür. Bu işə Salyan rayonunun Qaraçala qəsəbəsində - Əlikram Camalovun kəndli (fermer) təsərrüfatında başlanmışdır. Transplantasiya (köçürmə) prosesinə Ümumrusiya Elmi Tədqiqat Heyvandarlıq İnstitutunun çoxalmanın biologiyası, süni mayalama və embrionun köçürülməsi laboratoriyasının müdiri, biologiya elmləri doktoru, əslən Yardımlı rayonundan olan Əhməd Əbilov rəhbərlik edir. Köçürməni bilavasitə həmin institutun əməkdaşı, biologiya elmləri namizədi Andrey Malinovski aparır.
Respublikamızda yaxşı tanınan bu damazlıq müəssisəsində indiyədək 20 baş inək və düyənin bədəninə qara-ala cinsindən olan törədicilərin toxumundan əmələ gəlmiş embrionlar köçürülmüşdür. Müqaviləyə əsasən, bu rəqəmin 100-ə çatdırılması nəzərdə tutulmuşdur. Embrionlar xüsusi germetik aparatlarda Moskvadan gətirilir. Köçürülən embrionların anaları ildə 10-12 min litr süd verir.
Transplantasiyadan məqsəd qara-ala cinsinin Azərbaycan tipini yaratmaqdır.
