Asiya xalqları ədəbiyyatına həsr olunan beynəlxalq elmi konfrans seksiya iclasları ilə davam edib
Bakı, 17 dekabr, AZƏRTAC
Azərbaycan Milli Elmlər Akademiyasında (AMEA) keçirilən “Asiya xalqları ədəbiyyatı: ənənələr və müasir tendensiyalar” mövzusunda beynəlxalq elmi konfrans işini “Türk xalqları ədəbiyyatı”, “Müqayisəli ədəbiyyatşünaslıq”, “Şərqi Asiya xalqlarının ədəbiyyatı” və “Cənubi Asiya xalqlarının ədəbiyyatı” seksiyaları ilə davam etdirib.
AMEA-dan AZƏRTAC-a bildirilib ki, seksiya iclaslarında Asiya xalqları ədəbiyyatının problemlərinə və mərhələlərinə, şəxsiyyətlərinin yaradıcılığına həsr olunmuş 50-yə yaxın məruzə dinlənilib.
“Türk xalqları ədəbiyyatı” adlı I seksiya iclasında Azərbaycan, Özbəkistan, Qazaxıstan alimləri çıxış ediblər. Seksiya iclasında “Rollan Seysenbayevin “Qaçış” romanında 1930-cu illər qazax reallıqlarının təsviri”, “Mahmud Xoca Behbudi yaradıcılığında Səfərnamə janrı”, “Berdibek Sokpakbayevin “Mənim adım Kojadır” əsərində qazax həyatının əksi”, “Çolpanın “Tufan” şeiri haqqında (Anadolunun müzəffər ordularına həsr edilən şeir)”, “Türkmən ədəbiyyatının zirvəsi Məhtimqulu Fəraqi”, “Qazaxıstanda sinxron tərcümənin əhəmiyyəti”, “Orta Asiya xalqlarında “Oyanış dövrü” poeziyasında oxşarlıqlar” və digər mövzularda məruzələr dinlənilib.
“Müqayisəli ədəbiyyatşünaslıq” adlı II seksiya iclasında Azərbaycan, Türkiyə və Latviya alimləri çıxış ediblər. Tədbirdə “Transmilli plan üzrə ədəbi tədqiqlər: müqayisəli ədəbiyyat”, “Türk və Koreya mifoloji düşüncəsində ortaq xüsusiyyətlər”, “İki mədəniyyət, iki qadın: “Söyüdlü arx” və “Sinekli Bakkal” romanlarında qadınlığın təcəssümü”, “Şərq-Qərb ədəbiyyatlarının kəsişməsi: universallıq, əlaqələr və təsirlər”, “Şumer-Azərbaycan (türk) ədəbi əlaqələrinin müqayisəli öyrənilməsi məsələləri” və digər mövzularda məruzələr dinlənilib.
“Şərqi Asiya xalqlarının ədəbiyyatı” adlı III seksiya iclasında “Haruki Murakami romanlarında bədii məzmun və təhkiyə xüsusiyyətləri”, “Ba Jin yaradıcılığının ideya istiqamətləri”, “Kazuo İşiquro yaradıcılığında Asiya həyatı və mədəniyyətinin bədii əksi (“Dəyişən dünyanın rəssamı” romanının materialları əsasında)”, “Çin və Azərbaycan mədəniyyəti sivilizasiyaların toqquşması fonunda”, “Na Do-hyang yaradıcıllğında romantiz və realizmin bədii əksi”, “Monqolların gizli tarixi” əsərində Çingiz xan obrazı: ideal qəhrəman konsepsiyası” və digər mövzularda çıxışlar olub.
Beynəlxalq konfransın Cənubi Asiya xalqlarının ədəbiyyatına həsr olunmuş IV seksiyasında Azərbaycan, Vyetnam, Çin alimlərinin məruzələri dinlənilib. Tədbirdə “Vyetnam və italyan xalqlarının ədəbiyyat və həyat tərzinə müqayisəli yanaşma”, “Cəmiyyət və sənət: zamanın inikası”, “Əfqanıstanın qarabağlı azərbaycanlıları: mədəniyyəti və tarixi”, “Məhəmməd İqbal və Azərbaycan ədəbiyyatı”, “Rabindranat Taqorun bədii yaradıcılığının janr xüsusiyyətləri və problematikası” və digər mövzularda məruzələr təqdim edilib.
Daha sonra beynəlxalq konfransın bağlanış mərasimi olub. Mərasimdə çıxış edən AMEA-nın Humanitar Elmlər Bölməsinin Elmi şurasının sədrinin müavini akademik Teymur Kərimli tədbirdə bir çox Asiya xalqlarının aparıcı elm və təhsil mərkəzlərinin nümayəndələrinin iştirakının təqdirəlayiq olduğunu bildirib, seksiya iclaslarındakı məruzələrin geniş mövzuları əhatə etdiyini bildirib. Qeyd edib ki, uzun illər sonra Bakıda ilk dəfə Asiya ölkələri ədəbiyyatı ilə bağlı belə mötəbər bir tədbirin keçirilməsi Azərbaycanın dünyada artan nüfuzunun, eləcə də Asiya xalqlarının dövlətimizə olan münasibətinin göstəricisidir. Akademik Teymur Kərimli tarixi beynəlxalq konfransın növbəti illərdə Asiya xalqları arasında ədəbi, mədəni əlaqələrin inkişafına öz töhfəsini verəcəyini söyləyərək tədbirə yekun vurub.
Bölmənin digər xəbərləri
