AZƏRTAC-ın xüsusi müxbiri Strasburqdan xəbər verir ki, Avropa Şurası Parlament Assambleyası yay sessiyasının iyunun 22-də keçirilən iclasında “Türkiyənin öhdəliklərinin yerinə yetirilməsi”, “Avropa İnsan Hüquqları Məhkəməsi qərarlarının Türkiyə tərəfindən yerinə yetirilməsi” məsələləri ətrafında geniş müzakirələr keçirilmişdir. İstər məruzəçilər, istərsə də bir sıra deputatlarla yanaşı çıxış etmiş Azərbaycan nümayəndə heyətinin rəhbəri Səməd Seyidov və nümayəndə heyətinin üzvləri Bəxtiyar Əliyev, Rəfael Hüseynov, Asim Mollazadə, Əli Hüseynov bildirmişlər ki, son dövrlərdə Türkiyədə hüquqi dövlət quruculuğu sahəsində mühüm addımlar atılmış, yeni islahatlar aparılmışdır. Türkiyədə ölüm hökmü ləğv edilmiş, milli azlıqların öz müqəddəratlarını təyin etmələri ilə bağlı dövlət tərəfindən faydalı işlər görülmüşdür.
Deputatlar bildirmişlər ki, 1949-cu ildən Avropa Şurasının üzvü olan Türkiyədə son üç ildə ciddi dəyişikliklər baş vermiş, təhsil sisteminə diqqət artırılmış, söz və mətbuat azadlığına şərait yaradılmış, qadın azadlığı ilə əlaqədar yeni qanunlar qəbul edilmişdir. Vurğulanmışdır ki, müsəlman dünyasına nümunə olan Türkiyə sözün əsl mənasında demokratik inkişaf yoluna qədəm qoymuşdur. Məhz bu amillərə görə, deputatlar Türkiyə üzrə monitorinqin dayandırılmasını təklif etmişlər. Deputatların təklifi səsə qoyulmuşdur.
Səsvermənin nəticələrinə əsasən AŞPA-nın yay sessiyası Türkiyə üzrə monitorinqin dayandırılması barədə qərar qəbul etmişdir.
