Astanada soydaşımızın romanı təqdim olunub
Astana, 17 noyabr, AZƏRTAC
Astanada Rusiyada yaşayan soydaşımız, şairə və yazıçı Şahnaz Saynın rus dilində qələmə aldığı “Prednaçertannaya” (“Alın yazısı”) kitabının təqdimatı keçirilib.
AZƏRTAC xəbər verir ki, tədbirdə mədəniyyət xadimləri, müasir poeziya həvəskarları və gənc müəlliflər iştirak edirlər.
Azərbaycanəsilli yazıçı Şahnaz Sayn kitab üzərində iş prosesindən danışıb, əsərin əsas mövzuları ilə bağlı fikirlərini bölüşüb və qonaqların suallarını cavablandırıb. O, yaradıcılıq yolu, Rusiya ədəbi mühitində qazandığı uğurlar haqqında ətraflı məlumat verib və kitabın təqdimatının məhz Qazaxıstanda keçirilməsinin səbəbini izah edib.
Yazıçının sözlərinə görə, bu tədbirin Astanada keçirilməsi qərarı onun Qazaxıstan kitab pərakəndə satış şirkəti “Meloman” ilə əməkdaşlığının davamıdır və yerli auditoriyanın güclü marağının nəticəsidir. O qeyd edib ki, qələmə aldığı şeirlərin və romanın populyarlığı o qədər sürətlə artıb ki, onun əsərləri Qazaxıstanda marketpleyslər (onlayn kitab satışı-red.) vasitəsilə kütləvi şəkildə sifariş olunmağa başlayıb.
Şahnaz Sayn qeyd edib ki, romanın birinci hissəsi Astanada təqdim olunub, ikinci hissəsi isə hələ çapdan çıxmayıb. “İkinci hissə də çox tezliklə kitab mağazalarında görünəcək”, - deyə o bildirib.
Müəllif şeir yazması haqqında hekayəsini də bölüşüb: “Uzun müddətdir, 18 yaşımdan bəri yazıram, amma ilk kitabım cəmi on iki il sonra nəşr olundu. Heç kim gözləmirdi ki, cəmi bir il yarım ərzində şeir kitabımın tirajı 70 min nüsxəni keçəcək”.
Yazıçı kitablarının Azərbaycan auditoriyasında da böyük əks-səda doğurduğunu vurğulayıb. “Elə oldu ki, kitablarım marketpleyslər vasitəsilə Azərbaycanda da peyda oldu. Keçən il iki dəfə Bakıya səfər etdim və şeir kitablarını təqdim etdik. Həmin vaxt romanı hələ çapdan çıxmamışdı”, - deyə o qeyd edib.
Yazıçı həyata keçirmək istədiyi genişmiqyaslı ədəbi və media planlarından da bəhs edib. O bildirib ki, tezliklə romanının ikinci hissəsi çapdan çıxacaq, həmçinin bu əsərin ekranlaşdırılması üçün səy göstərəcək. Şahnaz xanım layihəni Türkiyə, Azərbaycan, başqa ölkələrdə də həyata keçirmək, habelə yen romanlar nəşr etdirmək planlarını da bölüşüb.
Tədbir oxucularla söhbət və əsərin əsas ideyasının müzakirəsi ilə başa çatıb.
Elşən Rüstəmov
AZƏRTAC-ın xüsusi müxbiri
Astana
Bölmənin digər xəbərləri
