Astanada yaşayan azərbaycanlı gənclər 20 Yanvar faciəsinin ildönümü ilə bağlı anma mərasimi keçirmişlər
Astana, 23 yanvar (AZƏRTAC). Astanada yaşayan azərbaycanlı gənclər 20 Yanvar faciəsinin 22-ci ildönümü ilə bağlı anma mərasimi keçirmişlər.
Tədbirdə şəhidlərin ruhu bir dəqiqəlik sükutla yad olunmuşdur.
Azərbaycanın Qazaxıstandakı səfirliyinin müşaviri Nizami Rüstəmov 20 Yanvar faciəsi haqqında ətraflı məlumat vermiş, sovet qoşunlarının Bakıda və respublikanın regionlarında törətdikləri vəhşiliklərdən, xalqımızın azadlıq mübarizəsindən, erməni işğalçılarının azğın əməllərindən danışmışdır. Bildirmişdir ki, faciədən bir gün sonra, yanvarın 21-də böyük siyasətçi, o vaxt Moskvada yaşayan ulu öndər Heydər Əliyev Azərbaycanın daimi nümayəndəliyinə gələrək Bakıda törədilmiş qırğını pisləmiş, bunun məsuliyyətini keçmiş SSRİ-nin rəhbəri Mixail Qorbaçovun üzərinə qoymuşdur.
Gənclər çıxışlarında Bakıda törədilmiş bu qanlı qırğını lənətləmişlər.
Qanlı Yanvar faciəsinin ildönümünə həsr olunmuş tədbirlər Qazaxıstanın bütün regionlarında keçirilmişdir.
Qulu Kəngərli
AZƏRTAC-ın xüsusi müxbiri
Astana
Bölmənin digər xəbərləri
