ASTARA RAYONUNUN SİTRUS VƏ SUBTROPİK MEYVƏ BAĞLARINDA MƏHSUL YIĞIMINA BAŞLANMIŞDIR
Astara, 15 noyabr (AZƏRTAC). Astara rayonunun sitrus və subtropik meyvə bağlarında məhsul yığımına başlanmışdır.
Bu il rayonda mövcud 720 hektar sitrus və 481 hektar subtropik meyvə bağlarında bol məhsul yetişdirilmişdir. İndiyədək bağlardan 7 min 100 ton narıngi, 6 min 500 ton feyxoa, 350 ton limon və 300 ton portağal yığılmışdır. Tədarük edilən məhsullar respublikamızın və Rusiyanın bazarlarında satılır.
Sitrusçuluqla məşğul olan fermerlər və torpaq mülkiyyətçiləri bu il bağlardan 10 min ton narıngi, 8 min ton feyxoa, 700 ton portağal, 600 ton limon və 200 ton kivi tədarük etməyi proqnozlaşdırırlar.
Qeyd edək ki, sitrusçuluq əsasən rayonun Kijəbə qəsəbəsində, Siyaku, Şuvi, Səncərədi, Təngərüd və Suparibağ ərazi icra nümayəndəliyinə daxil olan kəndlərdə daha çox inkişaf etmişdir.
Bölmənin digər xəbərləri
