Aşura günü qanvermə ənənəsi: İlahiyyat İnstitutunda izdiham və həmrəylik VİDEO
Bakı, 5 iyul, Göyçək Mahmudlu, AZƏRTAC
Məlum olduğu kimi, bu gün İslam dünyasında zülmə qarşı boyun əyməməyin, haqq yolunda sonadək mübarizə aparmağın örnəyi olan, insanlara əzmkarlığı aşılayan Aşura günüdür. İradəsi, mübarizliyi və haqq uğrunda son damla qanınadək döyüşməyi ilə seçilən Azərbaycan xalqı bu günü İslam dininin təməl prinsiplərinə uyğun olaraq xeyirxahlıq, ehtiyacı olan insanlara dəstək və humanizm keyfiyyətlərini əks etdirən tədbirlərlə qeyd edir. Artıq bir neçə ildir ki, ölkəmizdə Aşura günündə vətəndaşlar öz qanı ilə digərlərinə həyat bəxş etməyi, onların yaşamaq, cəmiyyətin bir fərdi kimi Vətənə, xalqa fayda vermək amalları uğrunda mübarizəsinə dəstək olmağı seçiblər.
Bu il də vətəndaşlar üçün həmin nəcib təşəbbüsdə fəal iştirak etmək üçün ölkənin dörd bir yanında, o cümlədən azad edilmiş ərazilərdə də şərait yaradıldı.
AZƏRTAC xəbər verir ki, iyulun 5-də Azərbaycan İlahiyyat İnstitutunda keçirilən qanvermə aksiyasında da izdiham müşahidə olunub. Dini Qurumlarla İş üzrə Dövlət Komitəsi, Qafqaz Müsəlmanları İdarəsi, Səhiyyə Nazirliyi, Qeyri-Hökumət Təşkilatlarına Dövlət Dəstəyi Agentliyi, Gənclər Fondu, Tibbi Ərazi Bölmələrini İdarəetmə Birliyi (TƏBİB), Respublika Qan Bankı, Azərbaycan İlahiyyat İnstitutu, Mənəvi Dəyərlərin Təbliği Fondu, Bakı İlahiyyat Kolleci, Milli QHT Forumu, Azərbaycan Qızıl Aypara Cəmiyyəti və Azərbaycan Könüllü Təşkilatları İttifaqının təşkilatçılığı ilə Aşura günündə keçirilən aksiyada dövlət rəsmiləri, Milli Məclisin deputatları, qeyri-hökumət təşkilatlarının üzvləri, eləcə də 100-dək könüllü və ictimaiyyət nümayəndələri iştirak ediblər. Hər yaş qrupundan olan vətəndaşlar İslam dininin əsl mahiyyətini dünyaya çatdırmaq və dinindən, dilindən, milliyyətindən asılı olmayaraq öz həmyerlilərinə dəstək olmaq üçün həmrəylik nümayiş etdiriblər.
Bu il ilk dəfə olaraq qanvermə məntəqələrinin siyahısına Şuşa və Ağdam məscidləri də daxil edilib
Dini Qurumlarla İş üzrə Dövlət Komitəsinin sədr müavini Gündüz İsmayılov AZƏRTAC-a müsahibəsində səhər saatlarından Azərbaycan İlahiyyat İnstitutunda başlayan qanvermə aksiyasında iştirak edənlərin, xüsusilə də gənclərin sayının çoxluq təşkil etməsinin sevindirici hal olduğunu qeyd edib:
“Azərbaycanda Aşura günündə qanvermə aksiyalarının keçirilməsi artıq ənənə halını alıb. Əsası bir neçə il öncə qoyulan həmin ənənə ildən-ilə genişlənir və qanvermə aksiyası keçirilən məntəqələrin sayı artır. Bu il qanvermə aksiyaları 40-a yaxın məntəqədə təşkil edildi. Təbii ki, aksiyanın əsas təşkilatçıları Dini Qurumlarla İş üzrə Dövlət Komitəsi və Qafqaz Müsəlmanları İdarəsidir. Bundan əlavə, digər qurumlar da bu prosesə qoşuldular. Gənclərin və Qeyri-Hökumət Təşkilatlarının aktivliyi müşahidə olundu. Sevindirici haldır ki, bu il ilk dəfə olaraq qanvermə məntəqələrinin siyahısına Şuşa və Ağdam məscidləri də daxil edildi. Şəhidlərimizin qanı ilə aldığımız torpaqlara köçən insanlar hemofiliya və talassemiyadan, eləcə də digər xəstəliklərdən əziyyət çəkənlər üçün qanvermə aksiyasına qoşuldular. Bu, bizim üçün həm sevindirici, həm də qürurverici haldır.
İmam Hüseyn əzadarlığına ən uyğun formada seçilmiş olan qanvermə aksiyası həm İslamın, həm də Azərbaycan xalqının mədəniyyəti və mənəviyyatının təcəssümü baxımından təqdirəlayiqdir. Qanvermə aksiyasında vətəndaşların fəal iştirakı üçün ilboyu din xadimləri, dini icmalar və qeyri-hökumət təşkilatları ilə birgə təbliğat işləri aparılır. Nəticədə hər il aksiyada iştirak edənlərin sayı artır.
Azərbaycan İlahiyyat İnstitutu iki ildir ki, bu aksiyaya qoşulub. Bu da çox önəmli məqamdır. Çünki Azərbaycan İlahiyyat İnstitutu ölkəmizdə ali dini təhsil verən yeganə ali təhsil müəssisəsidir. Bu sahədə peşəkar kadrlar məhz burada hazırlanır. Bu baxımdan prosesin məhz burada təhsil alan gənclərin gözü qarşısında baş verməsi və onların aktiv şəkildə iştirakı təqdirəlayiq haldır. İlkin təəssüratlar ondan ibarətdir ki, respublikada qanvermə aksiyası keçirilən bütün məntəqələrin qarşısı izdihamlıdır”.
Könüllülər öz qanı ilə həyat xilas etməyə könüllü şəkildə qoşulublar
İlk dəfədir qanvermə aksiyasına qoşulan könüllü gömrükçü Esmira Məmmədova deyib: “İslam dini özündə humanistliyi, xeyriyyəçiliyi, başqalarına yaxşılıq etməyi buyurur. Biz də bu gün ehtiyacı olan insanlara qan verməyə gəldik. Üç aydır könüllü kimi fəaliyyət göstərirəm. Bu gün könüllülük üçün vacib şərtlərdən olan xeyirxahlıq və təmənnasız yardım dəyərlərinə sadiq qalaraq könüllü şəkildə qan verdik. Vətəndaşları, həmyaşıdlarımızı dinimizin bizə aşıladığı kimi ehtiyacı olan insanları sevindirməyə, savab qazanmağa və İslamın düzgün təbliğinə, bu günün mahiyyətini dərindən çatdırmağa töhfə verməyə çağırıram”.
Digər könüllü gömrükçü Sayalı Əsədova isə aksiyada iştirakın onun üçün sadə bir hadisə olmadığını vurğulayıb: “Qan vermək insan həyatını xilas edə biləcək ən gözəl addımlardan biridir. Üstəlik bu gün Aşura günüdür və onun mənəvi dəyəri də var. Düşünürəm ki, insan bir başqasına yardım edə bilirsə, həmin fürsəti dəyərləndirməlidir. Bəzən kiçik bir şey etdiyimizi düşünürük, amma olsun ki, verdiyimiz qan bir uşağın, bir ananın, bir insanın həyatını dəyişəcək. Könüllü olmaq mənə bu cür savab və mənalı işlərin içində olmaq fürsəti verir və bu, məni çox xoşbəxt edir”.
Qeyd edək ki, Respublika Qan Bankının xüsusi tibb briqadasının həkim hematoloqları tərəfindən həyata keçirilən qanvermə prosesində toplanan qan hemofiliya və talassemiya, həmçinin digər xəstəlikdən əziyyət çəkən insanların müalicəsində istifadə olunacaq.
Xatırladaq ki, bu gün qanvermə aksiyaları Şuşa, Ağdam şəhərləri, Naxçıvan Muxtar Respublikası daxil olmaqla ölkəmizin müxtəlif şəhər və rayonlarında təşkil edilib.
Bölmənin digər xəbərləri
