Avropa “hava qalxanını” Kiyevə qədər genişləndirmək imkanını öyrənir
Bakı, 1 oktyabr, AZƏRTAC
Avropa ölkələrinin şərq sərhədlərində yaratmağı müzakirə etdiyi “dron səddi” Qərbi Ukraynanı, hətta Kiyev üzərindəki hava məkanını da əhatə edə bilər.
AZƏRTAC xəbər verir ki, bu barədə “The Daily Telegraph” qəzeti yazıb.
“Yüksək vəzifəli bir qrup qərb siyasətçisi və hərbçisinin irəli sürdüyü variantlardan biri Rusiyadan buraxılan raket və pilotsuz uçuş aparatlarını zərərsizləşdirmək üçün Ukraynanın qərbi üzərindəki hava məkanını qoruyacaq müdafiə sisteminin qurulmasıdır. Gələcəkdə faktiki uçuşsuz zonası olacaq bu “qalxanı” Kiyevə qədər genişləndirmək mümkün ola bilər”, – deyə məqalədə qeyd olunur.
Nəşrin vurğuladığına görə, Avropa ölkələri, o cümlədən Böyük Britaniya qəbul etməlidir ki, onlara “ABŞ-ın minimal dəstəyi ilə” hərəkət etmək lazım gələcək. Eyni zamanda, bütün Avropa qitəsinin gələcəyinə təsir imkanları onun müdafiəsi üçün birbaşa hərbi güc tətbiq etməyə hazır olmasından asılı olacaq.
“Dron səddi” layihəsi Almaniya, Polşa, Finlandiya və Baltikyanı ölkələrin birgə təşəbbüsüdür. Layihənin məqsədi Rusiya ilə sərhəd boyunca çoxqatlı monitorinq vasitələri və pilotsuz uçuş aparatlarından müdafiə üzrə avtomatlaşdırılmış sistemlərin yerləşdirilməsidir. Hazırda layihə işlənmə və prototiplərin seçimi mərhələsindədir.
Bölmənin digər xəbərləri
