Avropa maye qaz idxalını kəskin şəkildə artırıb
Bakı, 2 sentyabr, AZƏRTAC
Avropa ölkələri 2025-ci ilin avqust ayında maye qaz idxalını ötən ilin eyni dövrü ilə müqayisədə 33 faiz artıraraq 9,7 milyard kubmetrə çatdırıb.
AZƏRTAC xəbər verir ki, “Gas Infrastructure Europe” assosiasiyasının məlumatına görə, Avropa İttifaqına üzv ölkələr səkkiz ay ərzində 92,8 milyard kubmetr maye qaz idxal ediblər. Bu da ötən illə müqayisədə 24 faiz çoxdur. Avropa Qaz Nəqli Sistemi Operatorları Şəbəkəsinin (ENTSOG) hesablamalarına əsasən, 2025-ci ildə Avropanın mavi yanacaq idxalının 44,4 faizini maye qaz tədarükü təşkil edib. Rusiyanın idxaldakı payı konkret göstərilməsə də, onun Avropa İttifaqına maye qaz tədarükündə ABŞ-dan sonra ikinci yerdə qərarlaşdığı məlumdur.
Qeyd edək ki, bir müddət öncə Avropa Komissiyasının Prezidenti Ursula Fon der Lyayen Şotlandiyada ABŞ Prezidenti Donald Trampla ticarət danışıqlarında Avropa İttifaqının Rusiya enerji resurslarından imtina edərək Birləşmiş Ştatlardan tədarüklərə üstünlük verəcəyini bəyan edib.
Bölmənin digər xəbərləri
