Avropa ölkələri Rusiyadan rekord həcmdə LNG idxal edib
Bakı, 13 iyul, AZƏRTAC
Bu ilin birinci yarısında Avropa İttifaqına (Aİ) üzv ölkələrin Rusiyadan mayeləşdirilmiş təbii qaz (LNG) idxalı rekord səviyyəyə çatıb.
AZƏRTAC xarici mediaya istinadla xəbər verir ki, “Kpler”in məlumatına görə, Aİ ölkələri cari ilin yanvar-iyun ayları ərzində Rusiyadakı Yamal LNG müəssisəsindən ümumilikdə 136 yük olmaqla təxminən 9,9 milyon ton LNG idxal edib. Aİ-nin bu mənbədən LNG alışı indiyə qədər ən yüksək səviyyəyə çatıb ki, bu da ötən ilin eyni dövrü ilə müqayisədə təxminən 18 faiz artım deməkdir.
İlin birinci yarısında Yamal LNG müəssisəsindən yüklərin 97 faizindən çoxu Aİ limanlarına göndərilib. Rusiyadan ən çox LNG idxal edən ölkələr təxminən 3,6 milyon tonla Fransa, 2,9 milyon tonla Belçika və 2,7 milyon tonla İspaniya olub.
Hesablamalara görə, bu dövrdə Aİ-nin Yamal LNG-dən məhsul alışının dəyəri təxminən 6 milyard avro təşkil edib.
Aİ-nin uzunmüddətli müqavilələr çərçivəsində Rusiyadan LNG alışı 2027-ci il yanvarın 1-də başa çatacaq. Rusiyadan boru kəməri qazının idxalı isə 2027-ci ilin sentyabr ayının sonuna qədər tamamilə dayandırılacaq.
Bölmənin digər xəbərləri
