Avropa Parlamenti rəsmi Tbilisi ilə hökm dilində danışmaq istəyir - RƏY
Tbilisi, 14 oktyabr, AZƏRTAC
Yaxın günlərdə Gürcüstanda keçiriləcək parlament seçkiləri ilk dəfə olaraq proporsional sistem üzrə təşkil olunacaq. Mövcud hakimiyyət seçkilərin azad, demokratik və şəffaf keçiriləcəyini vəd edir və bunun üçün səylə çalışır. Seçkilərin azad və demokratik şəkildə keçirilməsi, eyni zamanda, ölkədə sülh və sabitliyin olması Gürcüstanda yaşayan azərbaycanlılar üçün də çox vacibdir.
Bu sözləri AZƏRTAC-a açıqlamasında Gürcüstan Azərbaycanlıları Konqresinin (GAK) sədri Hüseyin Yusifov söyləyib.
O qeyd edib ki, Gürcüstanda və ümumiyyətlə, regionda sabitliyi istəməyən qüvvələr çoxdur. Bu gün bəzi Qərb dövlətləri və Amerika müxtəlif yollarla Gürcüstana təzyiq göstərməklə bizi Rusiya ilə ikinci cəbhə açmağa məcbur etməyə çalışır. Avropa Parlamentinin, Almaniya Bundestaqının, ABŞ-ın qəbul etdikləri qərar və qətnamələr, sanksiyalar hamı kimi, bizi də ciddi narahat edir. Avropa Parlamenti Gürcüstanla hökm dilində danışmağa çalışır. Bu da bizə keçmiş SSRİ-ni xatırladır. O zaman da Kremldə oturanlar kimin seçiləcəyini, necə yaşayacağımızı diktə edirdilər. Biz kiminsə əmrinə girmək istəmədiyimiz üçün müstəqil olduq. İndi də nə Qərbin, nə də Amerikanın tabeliyinə girməyəcəyik. Onlar bizi müharibəyə sürükləyirlər. Biz müharibənin necə bəlalar gətirdiyini görmüşük. Ona görə də heç birimiz ölkəmizin yenidən müharibəyə cəlb olunmasına imkan verməməli, sülh və sabitlik üçün çalışmalıyıq. Qərbin sanksiyaları heç kimi qorxutmamalıdır.
“Təəssüf, nə Qərb, nə də digərləri fikirləşmirlər ki, sadə insanların onlara qarşı fikirləri necə mənfiyə doğru dəyişir. Bu, bizim istədiyimiz Avropa ola bilməz”, – deyən H.Yusifov vurğulayıb ki, Gürcüstan hakimiyyəti ölkədə və regionda sabitliyin qorunması üçün hər şeyi edir. Tbilisi region ölkələri ilə sıx əməkdaşlıq əlaqələri qurub. Azərbaycan ilə Gürcüstan arasındakı dostluq və qardaşlıq əlaqələri bu ölkədə yaşayan bütün soydaşlarımızın maraqlarının qorunmasını təmin edir. Biz əminik ki, seçkilərdən sonra da iki ölkə arasında əlaqələr daha da möhkəmlənəcək və inkişaf edəcək. Biz tarixən dost olmuşuq və bu, belə də olacaq.
O, həmçinin bildirib ki, Gürcüstan hökuməti bir çox hallarda Azərbaycanın təcrübəsini öyrənir və təqdir edir. “Azərbaycan hökuməti də müxtəlif təzyiq və təqiblərə, sanksiyalara məruz qalıb. Lakin buna baxmayaraq, Prezident İlham Əliyevin rəhbərliyi ilə Azərbaycan Ordusu torpaqlarını işğaldan azad edib. İndi Azərbaycanda sabitlikdir və ölkə güclü iqtisadi inkişaf yolu keçir. Əlbəttə, bu təcrübə bizim üçün də məqbuldur. İnanıram ki, Gürcüstan da öz ərazisində sülhü və sabitliyi təmin edəcək”, - deyə o bildirib.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
