Avropada Çin məhsullarına 30 faiz rüsum tətbiq edilməsi təklif olunur
Paris, 10 fevral, AZƏRTAC
Avropa sənayesinin sürətlə zəifləməsi Fransa hökumətində ciddi narahatlıq doğurur. Strategiya və Planlaşma üzrə Ali Komissarlıq rəhbəri Kleman Bon Çin sənayesinin Avropa üçün yaratdığı təhlükə ilə bağlı sərt xəbərdarlıq edib.
AZƏRTAC xəbər verir ki, Kleman Bonun sözlərinə görə, Fransa son iyirmi il ərzində Çin sənayesinin təzyiqi altında dərin sənayesizləşmə mərhələsi yaşayıb.
Tekstil, məişət texnikası və elektronika kimi sahələrdə müşahidə olunan bu geriləmə artıq yalnız Fransaya deyil, bütün Avropa İttifaqına, hətta daha kəskin şəkildə Almaniyaya da aiddir. O vurğulayıb ki, bu proses hələ başa çatmayıb.
Ali komissar bildirib ki, Çinin istehsal xərcləri Avropa ilə müqayisədə 30–40 faiz daha aşağıdır və bu, artıq təkcə qiymət deyil, keyfiyyət baxımından da ciddi rəqabət yaradır. O, xüsusilə elektrik avtomobillərini nümunə göstərərək xəbərdarlıq edib.
“Əgər biz baş verənlərə güclü ticarət qalxanı ilə cavab verməsək, bu, ümumilikdə Avropa sənayesi üçün ölüm təhlükəsidir. Bu təhlükənin qarşısını almaq üçün Çin məhsullarına 30 faiz gömrük rüsumu tətbiq edilməsini təklif edirəm. Bununla yanaşı, Fransada kiçik bağlamalar üçün nəzərdə tutulan 2 avroluq verginin və Avropa səviyyəsində planlaşdırılan 3 avroluq rüsum qüvvədə saxlanılmalıdır. Çin rəqabəti Fransa və Avropa sənayesinin tənəzzülünün əsas səbəblərindən biridir. Hər sahədə ayrı-ayrı deyil, ümumi və sürətli bir mübarizə planı vacibdir. Bəzi sahələr tamamilə yox olub. Bir neçə ay ərzində yüz minlərlə iş yeri itirilib”, – deyə o qeyd edib.
Ali komissar günəş panelləri sektorunu misal çəkərək xatırladıb ki, Avropa 2010-cu illərin əvvəllərinə qədər bu sahədə dünya lideri idi, lakin cəmi üç il ərzində bazardan tamamilə silinib. Sənayesizləşmənin məşğulluğa təsiri isə xüsusilə Almaniyada özünü göstərir. Onun sözlərinə görə, bu ölkədə hər ay təxminən 10 min sənaye iş yeri bağlanır. Kleman Bon etiraf edir ki, “Shein” kimi platformalarda satılan məhsullar istehlakçılar üçün daha ucuzdur. Lakin o xəbərdarlıq edir ki, əsas problem uzunmüddətli nəticələrdir: “Əgər sabah kiçik ticarətdə, moda sənayesində və ümumilikdə sənayedə on minlərlə iş yeri yox olarsa, istehlakçı sadəcə mövcud olmayacaq”.
Bölmənin digər xəbərləri
